Oral qalasyndaǵy «Miasokombinat» aýmaǵynda turatyn birqatar turǵyndardy Jaiyq ózeninen alystaý, qaýipsiz aimaqqa kóshirý josparlanyp otyr,– dep habarlaidy Dalanews.kz 24.kz arnasyna silteme jasap.
Qazir osy máselemen qala ákimdigi janynan qurylǵan arnaiy komissiia ainalysyp jatyr. Mamandar jergilikti turǵyndarmen kelissózder júrgizip, jer telimderin zań aiasynda alý jáne turǵyndardy kóshirýdiń tiimdi joldaryn qarastyrýda.
Osy aýmaqta turatyn turǵyndardyń biri Viktor Sviaginniń aitýynsha, byltyrǵy tasqyn kezinde Jaiyq ózeniniń sýy onyń ýchaskesine deiin jaqyndaǵan.
«Sońǵy eki jylda ózen jaǵaýyn shamamen segiz metrge deiin jep qoidy. Ótken kóktemde muz júrý kezinde sý ormanǵa deiin jetip, kóptegen aǵashty qulatyp ketti. Buryn ózen jaǵasy turǵan jer qazir 200 metrge alystap ketken», – deidi ol.
Qaýip aimaǵynda qazirgi tańda 10 jer telimi bar, onyń ishinde alty turǵyn úi ornalasqan. Bul úilerdiń jaǵdaiyn baǵalaý úshin mamandar jumys isteýde.
Oral qalalyq turǵyn úi-kommýnaldyq sharýashylyq, jolaýshylar kóligi jáne avtomobil joldary bóliminiń basshysy Abylai Nurmaqovtyń aitýynsha, eger turǵyndar óz úilerin bosatýǵa kelisse, olar naryqtaǵy baǵaǵa sai ótemaqy alady nemese kópqabatty turǵyn úilerden jańa baspana usynylady.
«Biz turǵyn úi qatynastary týraly zań aiasynda áreket etemiz. Halyqqa túsindirý jumystary júrgizilip jatyr. Eger turǵyndar usynylǵan páterden bas tartsa, olarǵa qarjylai ótemaqy tólenedi», – dedi ol.
Qazirgi tańda sarapshylar turǵyndardy kóshirý boiynsha ońtaily sheshimderdi pysyqtap jatyr.
