ورال قالاسىنداعى «مياسوكومبينات» اۋماعىندا تۇراتىن ءبىرقاتار تۇرعىنداردى جايىق وزەنىنەن الىستاۋ، ءقاۋىپسىز ايماققا كوشىرۋ جوسپارلانىپ وتىر،– دەپ حابارلايدى Dalanews.kz 24.kz ارناسىنا سىلتەمە جاساپ.

ءقازىر وسى ماسەلەمەن قالا اكىمدىگى جانىنان قۇرىلعان ارنايى كوميسسيا اينالىسىپ جاتىر. ماماندار جەرگىلىكتى تۇرعىندارمەن كەلىسسوزدەر جۇرگىزىپ، جەر تەلىمدەرىن زاڭ اياسىندا الۋ جانە تۇرعىنداردى كوشىرۋدىڭ ءتيىمدى جولدارىن قاراستىرۋدا.

وسى اۋماقتا تۇراتىن تۇرعىنداردىڭ ءبىرى ۆيكتور سۆياگيننىڭ ايتۋىنشا، بىلتىرعى تاسقىن كەزىندە جايىق وزەنىنىڭ سۋى ونىڭ ۋچاسكەسىنە دەيىن جاقىنداعان.

«سوڭعى ەكى جىلدا وزەن جاعاۋىن شامامەن سەگىز مەترگە دەيىن جەپ قويدى. وتكەن كوكتەمدە مۇز ءجۇرۋ كەزىندە سۋ ورمانعا دەيىن جەتىپ، كوپتەگەن اعاشتى قۇلاتىپ كەتتى. بۇرىن وزەن جاعاسى تۇرعان جەر ءقازىر 200 مەترگە الىستاپ كەتكەن»، – دەيدى ول.

ءقاۋىپ ايماعىندا قازىرگى تاڭدا 10 جەر تەلىمى بار، ونىڭ ىشىندە التى تۇرعىن ءۇي ورنالاسقان. بۇل ۇيلەردىڭ جاعدايىن باعالاۋ ءۇشىن ماماندار جۇمىس ىستەۋدە.

ورال قالالىق تۇرعىن ۇي-كوممۋنالدىق شارۋاشىلىق، جولاۋشىلار كولىگى جانە اۆتوموبيل جولدارى ءبولىمىنىڭ باسشىسى ابىلاي نۇرماقوۆتىڭ ايتۋىنشا، ەگەر تۇرعىندار ءوز ۇيلەرىن بوساتۋعا كەلىسسە، ولار نارىقتاعى باعاعا ساي وتەماقى الادى نەمەسە كوپقاباتتى تۇرعىن ۇيلەردەن جاڭا باسپانا ۇسىنىلادى.

«ءبىز تۇرعىن ءۇي قاتىناستارى تۋرالى زاڭ اياسىندا ارەكەت ەتەمىز. حالىققا ءتۇسىندىرۋ جۇمىستارى جۇرگىزىلىپ جاتىر. ەگەر تۇرعىندار ۇسىنىلعان پاتەردەن باس تارتسا، ولارعا قارجىلاي وتەماقى تولەنەدى»، – دەدى ول.

قازىرگى تاڭدا ساراپشىلار تۇرعىنداردى كوشىرۋ بويىنشا وڭتايلى شەشىمدەردى پىسىقتاپ جاتىر.