Shymkenttegi «Kórme» ortalyǵynda ótip jatqan  «ONTUSTIK ónimderi-2017» kórme-jármeńkesi aıasynda  «Qazaqstannyń úzdik taýary» baıqaýynyń jeńimpazdary anyqtaldy. Jeńimpazdardy elimizdiń  Din isteri jáne azamattyq qoǵam  mınıstri Nurlan Ermekbaev pen Ońtústik Qazaqstan oblysynyń ákimi Janseıit Túımebaev «Halyqtyń tańdaýy», «Jyl serpini», «Jyl brendi», «Áleýmettik mańyzdy startap» atty nomınasıalarmen marapattap, baǵaly syılyqtar tabys etti.

Odan bólek, konkýrstyń jeńimpazdary Astanada ótkiziletin respýblıkalyq «Qazaqstannyń úzdik taýary» kórme-konkýrsyna qatysýǵa joldama  aldy.

«Zerde-Keramıka», «Hamıt» AÓK, «Bal Tekstıl» JSHS, «ArtSapaly qurylys» JSHS, «Madlen» JSHS men  jeke kásipker «Qudaıbergenov» kompanıalary jeńimpazdar qatarynan kórindi.

Aıta keteıik,  sarapshy komısıa ókilderi ekspozısıalardyń barlyǵyn qarap, baıqaý qatysýshylaryn 3 atalym − «Halyq úshin úzdik taýar», «Óndiristik baǵyttaǵy úzdik taýar» jáne «Úzdik azyq-túliktik taýar» nomınasıalary boıynsha anyqtaǵan bolatyn.  Konkýrsqa qatysýshylardy baqylaý kezinde aldymen taýardyń sapasy men básekege qabilettiligi eskerildi.

Ońtústik Qazaqstannyń taýar óndirýshilerin qoldaý jáne olardy halyqqa keńinen tanystyrýdy maqsat tutqan sharaǵa kúngeıde óndiriletin tamaq, farmasevtıka, mashına jasaý, hımıa, qurylys salasyna qatysty 200-den astam taýar óndirýshi qatysty.



 

 OQO ákiminiń baspasóz qyzmeti