Kaspii teńizinde qaza tapqan 14 áskeri qyzmetshi týraly suraq qoiǵan Ulysmedia.kz jýrnalisti Ásem Ǵumarovaǵa Quryltai apparaty eskertý jasap, reglament qaita buzylǵan jaǵdaida ony alty aiǵa turaqty akkreditatsiiadan aiyrý máselesin kóterýi múmkin ekenin málimdedi, dep habarlaidy dalanews.kz.
Bul týraly Ulysmedia.kz redaktsiiasyna Quryltai apparaty basshysynyń orynbasary Bolat Qaliianbekov hat joldaǵan. Onyń aitýynsha, jýrnalist 30 qyrkúiekte ótken brifing barysynda is-sharanyń jariialanǵan kún tártibine qatysy joq eki suraq qoiǵan.
Brifing «Kiberqylmystar týraly konventsiiany ratifikatsiialaý týraly» zań jobasyna arnaldy. Is-sharaǵa Quryltai depýtaty Únzila Shapaq pen ishki ister vitse-ministri Sanjar Ádilov qatysty.
Jýrnalist Únzila Shapaqtan Quryltai depýtattary qaza tapqan áskeri qyzmetshilerdiń otbasylaryna kómek kórsetý úshin jinaǵan 146 mln teńgeniń qashan berilýi múmkin ekenin suraǵan. Buǵan deiin depýtattar jinaǵan qarajattyń kólemi 146,65 mln teńge bolǵany habarlanǵan. Qarajatty otbasylar arasynda bólý qor men komissiia tarapynan jinaý aiaqtalǵannan keiin júzege asyrylatyny aitylǵan.
Al Sanjar Ádilovke jýrnalist Threads áleýmettik jelisindegi syni jazbalardyń avtorlaryna jasalǵan jappai qońyraýlar týraly suraq qoiǵan. Birqatar qoldanýshy ózderine qońyraý shalǵan adamdardyń politsiia qyzmetkerleri retinde tanysyp, Kaspiidegi qaiǵyly oqiǵaǵa qatysty jazbalaryn óshirýdi talap etkenin aitqan.
Ádilov buǵan deiin bul aqparatty joqqa shyǵarǵan. Vitse-ministr politsiia qyzmetkerleri mundai qońyraýlar jasamaǵanyn málimdegen.
Quryltai apparatynyń hatynda jýrnalist reglamentti taǵy da buzǵan jaǵdaida onyń Quryltai janyndaǵy turaqty akkreditatsiiasynan alty aiǵa aiyrý máselesin kóterý quqyǵy bar ekeni kórsetilgen.
Jaǵdaiǵa Halyqaralyq sóz bostandyǵyn qorǵaý qorynyń «Ádil sóz» prezidenti Nazira Dárimbet pikir bildirdi. Onyń aitýynsha, ishki tártip erejeleri Konstitýtsiia men «Mass-media týraly» zańda bekitilgen sóz bostandyǵy jáne aqparat alý quqyǵynyń negizgi kepildikterin almastyrmaýǵa tiis.
«Taqyrypqa qatysy joq» suraq qoiýdy óreskel buzýshylyq retinde baǵalap, akkreditatsiiadan aiyrýmen qorqytý jýrnalister arasynda ózin-ózi tsenzýralaý qaýpin kúsheitýi múmkin, - dep málimdedi Dárimbet.
Ol jýrnalistiń parlament qabyrǵasynda depýtattar men memlekettik organdar ókilderine tikelei suraq qoiýy qoǵam úshin mańyzdy máseleler boiynsha jedel aqparat alýdyń mańyzdy tetigi ekenin atap ótti.
Eske salaiyq, Kaspii teńizindegi qaiǵyly oqiǵa 24 qyrkúiekte «Hazar qorǵany – 2026» oqý-jattyǵýy kezinde bolǵan. Qolaisyz aýa raiy saldarynan 17 áskeri qyzmetshini teńiz aǵyzyp áketip, onyń úsheýi aman qalǵan, 14 áskeri qyzmetshi qaza tapty.
Qaiǵyly oqiǵaǵa bailanysty qylmystyq is qozǵalyp, Qazaqstan Qarýly kúshteriniń joǵary jáne aǵa basshylyq quramyndaǵy bes áskeri qyzmetshi ustalǵan.
Al jańa Quryltaidaǵy jýrnalisterdiń jumysyna qatysty erejeler boiynsha BAQ ókilderi kýlýarlarda jumys istei almaidy jáne brifingter men baspasóz máslihattarynda jariialanǵan kún tártibine qatysy joq suraqtar qoiýǵa shekteý qoiylǵan.
