Каспий теңізінде қаза тапқан 14 әскери қызметші туралы сұрақ қойған Ulysmedia.kz журналисті Әсем Ғұмароваға Құрылтай аппараты ескерту жасап, регламент қайта бұзылған жағдайда оны алты айға тұрақты аккредитациядан айыру мәселесін көтеруі мүмкін екенін мәлімдеді, деп хабарлайды dalanews.kz.
Бұл туралы Ulysmedia.kz редакциясына Құрылтай аппараты басшысының орынбасары Болат Қалиянбеков хат жолдаған. Оның айтуынша, журналист 30 қыркүйекте өткен брифинг барысында іс-шараның жарияланған күн тәртібіне қатысы жоқ екі сұрақ қойған.
Брифинг «Киберқылмыстар туралы конвенцияны ратификациялау туралы» заң жобасына арналды. Іс-шараға Құрылтай депутаты Үнзила Шапақ пен ішкі істер вице-министрі Санжар Әділов қатысты.
Журналист Үнзила Шапақтан Құрылтай депутаттары қаза тапқан әскери қызметшілердің отбасыларына көмек көрсету үшін жинаған 146 млн теңгенің қашан берілуі мүмкін екенін сұраған. Бұған дейін депутаттар жинаған қаражаттың көлемі 146,65 млн теңге болғаны хабарланған. Қаражатты отбасылар арасында бөлу қор мен комиссия тарапынан жинау аяқталғаннан кейін жүзеге асырылатыны айтылған.
Ал Санжар Әділовке журналист Threads әлеуметтік желісіндегі сыни жазбалардың авторларына жасалған жаппай қоңыраулар туралы сұрақ қойған. Бірқатар қолданушы өздеріне қоңырау шалған адамдардың полиция қызметкерлері ретінде танысып, Каспийдегі қайғылы оқиғаға қатысты жазбаларын өшіруді талап еткенін айтқан.
Әділов бұған дейін бұл ақпаратты жоққа шығарған. Вице-министр полиция қызметкерлері мұндай қоңыраулар жасамағанын мәлімдеген.
Құрылтай аппаратының хатында журналист регламентті тағы да бұзған жағдайда оның Құрылтай жанындағы тұрақты аккредитациясынан алты айға айыру мәселесін көтеру құқығы бар екені көрсетілген.
Жағдайға Халықаралық сөз бостандығын қорғау қорының «Әділ сөз» президенті Назира Дәрімбет пікір білдірді. Оның айтуынша, ішкі тәртіп ережелері Конституция мен «Масс-медиа туралы» заңда бекітілген сөз бостандығы және ақпарат алу құқығының негізгі кепілдіктерін алмастырмауға тиіс.
«Тақырыпқа қатысы жоқ» сұрақ қоюды өрескел бұзушылық ретінде бағалап, аккредитациядан айырумен қорқыту журналистер арасында өзін-өзі цензуралау қаупін күшейтуі мүмкін, - деп мәлімдеді Дәрімбет.
Ол журналистің парламент қабырғасында депутаттар мен мемлекеттік органдар өкілдеріне тікелей сұрақ қоюы қоғам үшін маңызды мәселелер бойынша жедел ақпарат алудың маңызды тетігі екенін атап өтті.
Еске салайық, Каспий теңізіндегі қайғылы оқиға 24 қыркүйекте «Хазар қорғаны – 2026» оқу-жаттығуы кезінде болған. Қолайсыз ауа райы салдарынан 17 әскери қызметшіні теңіз ағызып әкетіп, оның үшеуі аман қалған, 14 әскери қызметші қаза тапты.
Қайғылы оқиғаға байланысты қылмыстық іс қозғалып, Қазақстан Қарулы күштерінің жоғары және аға басшылық құрамындағы бес әскери қызметші ұсталған.
Ал жаңа Құрылтайдағы журналистердің жұмысына қатысты ережелер бойынша БАҚ өкілдері кулуарларда жұмыс істей алмайды және брифингтер мен баспасөз мәслихаттарында жарияланған күн тәртібіне қатысы жоқ сұрақтар қоюға шектеу қойылған.
