Kaspii teńizindegi áskeri oqý-jattyǵý kezinde 14 áskeri qyzmetshiniń qaza bolýyna bailanysty qozǵalǵan qylmystyq is aiasynda Qazaqstan Áskeri-teńiz kúshteriniń burynǵy bas qolbasshysy Qanat Niiazbekov ustaldy. Sot onyń qamaýǵa alynýyna sanktsiia bergen, dep habarlaidy dalanews.kz.
Ishki ister ministrliginiń málimetinshe, Qanat Niiazbekov qyzmetine salǵyrt qarady degen kúdikpen ýaqytsha ustaý izoliatoryna qamalǵan.
"IIM-niń áskeri-tergeý bólimshesi Kaspii teńizindegi oqý-jattyǵý kezinde áskeri qyzmetshilerdiń qaza bolý faktisi boiynsha qozǵalǵan qylmystyq isti tergeý aiasynda qyzmetine salǵyrt qarady degen kúdikpen Qazaqstan Qarýly kúshteri Áskeri-teńiz kúshteriniń burynǵy bas qolbasshysy, 1-dárejeli kapitandy ustap, ýaqytsha ustaý izoliatoryna qamady", – dep habarlady IIM.
Qazirgi ýaqytta sotqa deiingi tergeý jalǵasyp jatyr. Qylmystyq is boiynsha túpkilikti quqyqtyq baǵa tergeý qorytyndysy men sot sheshiminen keiin beriledi.
Qanat Niiazbekov kim?
Qanat Serikqaliuly Niiazbekov – 1-dárejeli kapitan, Qazaqstan Qarýly kúshteri Áskeri-teńiz kúshteriniń burynǵy bas qolbasshysy.
Ol Aiagóz qalasynda, qazirgi Abai oblysynyń aýmaǵynda dúniege kelgen. Almatydaǵy Baýyrjan Momyshuly atyndaǵy respýblikalyq áskeri mektep-internatty, keiin Kaliningradtaǵy joǵary áskeri-teńiz oqý ornyn jáne Sankt-Peterbýrgtegi N.G. Kýznetsov atyndaǵy Áskeri-teńiz akademiiasyn támamdaǵan.
Niiazbekov áskeri qyzmetin Qazaqstan UQK Shekara qyzmetiniń teńiz bólimderinde kúzet kemesi komandiriniń kómekshisi retinde bastaǵan. Keiin Áskeri-teńiz kúshteri Bas shtabynyń bastyǵy – bas qolbasshynyń birinshi orynbasary qyzmetine deiin kóterilgen.
2025 jyly ol Qazaqstan Áskeri-teńiz kúshteriniń bas qolbasshysy bolyp taǵaiyndaldy. Buǵan deiin Qazaqstan men Ázerbaijannyń "Kaspii brizi – 2025" birlesken oqý-jattyǵýyna Áskeri-teńiz kúshteri bas qolbasshysynyń birinshi orynbasary retinde qatysqan.
Bas qolbasshy qyzmetinde Niiazbekov Kaspii teńizindegi áskeri daiyndyq pen oqý-jattyǵýlarǵa jetekshilik etti. Qorǵanys ministrligi jariialaǵan materialdarda ol teńizdegi nysandardy qorǵaý, bólimshelerdiń ózara is-qimyly jáne jaýyngerlik daiyndyq máseleleri boiynsha pikir bildirgen.
Kaspiidegi tragediia
24 qyrkúiekte Mańǵystaý oblysynda ótken áskeri oqý-jattyǵý kezinde aýa raiynyń kúrt nasharlaýy men qatty jel saldarynan 17 áskeri qyzmetshi teńizge túsip ketken. Úsheýi aman qalyp, 14 áskeri qyzmetshi qaza tapty.
Oqiǵadan keiin qylmystyq is qozǵalyp, qaýipsizdik talaptarynyń saqtalýy, aýa raiynyń eskerilýi jáne qutqarý jumystarynyń uiymdastyrylýy tekserile bastady.
3 qazanda Prezident Qasym-Jomart Toqaev Qanat Niiazbekovti Áskeri-teńiz kúshteriniń bas qolbasshysy qyzmetinen bosatty.
