Qazaqstan Halyq Keńesi Qoǵamdyq kelisim jáne jalpyulttyq birlik komitetiniń alǵashqy otyrysynda tórt salalyq komissiianyń jetekshileri bekitilip, 2026–2027 jyldarǵa arnalǵan jumys josparynyń jobasy qaraldy, dep habarlaidy dalanews.kz.
Komitet otyrysyn onyń tóraǵasy Marat Ázilhanov júrgizdi. Jiynǵa Qazaqstan Halyq Keńesi Tóraǵasynyń orynbasary – Hatshylyq basshysy Qanatbek Jaisanbaev qatysty.
Otyrys barysynda Halyq Keńesi múshelerin salalyq komissiialarǵa bólý máselesi qaraldy. Komitet tóraǵasy bul qurylymdardyń qoǵamdyq jáne sarapshylyq áleýetti biriktirip, el aldynda turǵan ózekti máselelerdi talqylaýǵa múmkindik beretinin atap ótti.
Bekitilgen sheshimge sáikes, Mádeniet pen azamattyq biregeilikti damytý máseleleri jónindegi salalyq komissiiany Raýan Kenjehanuly basqardy.
Jalpyulttyq birlik máseleleri jónindegi salalyq komissiianyń jetekshisi bolyp Narine Mikaelian, Sport jáne áskeri-patriottyq tárbie máseleleri jónindegi salalyq komissiianyń jetekshisi bolyp Islam Bairamýkov taǵaiyndaldy.
Al Quqyqtyq mádeniet jáne mediatsiia máseleleri jónindegi salalyq komissiiaǵa Mádi Myrzaǵaraev jetekshilik etetin boldy.
Otyrysta komitettiń memlekettik organdarmen, azamattyq qoǵam institýttarymen jáne Keńes hatshylyǵymen ózara is-qimyl baǵyttary men tetikteri de talqylandy. Negizgi nazar qoǵamdyq usynystardy salalyq komissiialar men jumys toptarynda saraptamadan ótkizýge aýdaryldy. Bul jumysqa tiisti sala mamandaryn tartyp, usynystardyń sapasy men negizdiligin arttyrý kózdelip otyr.
Sonymen qatar komitettiń 2026–2027 jyldarǵa arnalǵan jumys josparynyń jobasy qaraldy. Qujatta saraptamalyq kezdesýler, keń aýqymdy qoǵamdyq talqylaýlar jáne keńeitilgen otyrystar ótkizý qarastyrylǵan.
Otyrys barysynda qazaq tilin damytý jáne jalpyulttyq birlikti nyǵaitý máseleleri de kóterildi. Memleket basshysy Qasym-Jomart Toqaevtyń qazaq tilin damytý arqyly jalpyulttyq birlikti nyǵaityp, memlekettilikti kúsheitý jónindegi tapsyrmalaryn iske asyrý aiasynda Raýan Kenjehanuly óz usynysyn tanystyrdy.
Ol qazaq ádebietimen qatar álem ádebietiniń úzdik týyndylaryn, sondai-aq Qazaqstanda turatyn etnostardyń ádebi jáne mádeni murasyn qazaq tiline aýdaryp, keńinen nasihattaý qajet ekenin aitty.
«Qazaq ádebietimen qatar, álem ádebietiniń úzdik týyndylaryn, sonyń ishinde Qazaqstanda turatyn ózge etnostardyń ádebi jáne mádeni murasyn qazaq tiline aýdaryp, keńinen nasihattaýǵa jaǵdai jasaýymyz qajet», – dedi Raýan Kenjehanuly.
Onyń pikirinshe, mundai jumystar oqyrmannyń dúnietanymyn keńeitip, memlekettik til arqyly Qazaqstandaǵy túrli mádeni murany tanýǵa múmkindik beredi.
Qazaq tilin oqytý máselesin Olga Spirina da kóterdi. Ol qazaq tilin ana tili emes, ekinshi til retinde oqytý kezinde kezdesetin kedergilerdi atap ótti. Onyń aitýynsha, qazirgi mektep baǵdarlamalary oqýshylardyń qazaq tilinde erkin sóileý daǵdysyn qalyptastyrýǵa tolyq múmkindik bermeidi. Osyǵan bailanysty ol ádiskerler men pedagogterden quralǵan jumys tobyn quryp, qazaq tilin oqytý ádistemesin qaita qaraýdy, bilim deńgeiin baǵalaýdyń naqty kriteriilerin engizýdi jáne muǵalimderge ádistemelik qoldaý kórsetýdi usyndy.
Mádeniet salasyn jańǵyrtý máselesin Irina Soloveva kóterdi. Ol zamanaýi tehnologiialardy paidalaný jáne tikelei qarym-qatynas formatyn damytý arqyly mýzeilerdi jastar úshin tartymdy orynǵa ainaldyrýdy usyndy. Sondai-aq ol mádeniet salasyn damytýda metsenattyqty kúsheitip, biznes ókilderimen áleýmettik áriptestikti nyǵaitýdyń mańyzyn atap ótti. Onyń pikirinshe, kásipkerlerdiń mádenietke qoldaý kórsetýi adam kapitalyn damytýǵa yqpal etetin baǵyttardyń birine ainalýy tiis.
Komitet otyrysynda aitylǵan usynystar aldaǵy ýaqytta salalyq komissiialarda saraptamadan ótedi. Jinaqtalǵan bastamalar Qazaqstan Halyq Keńesi Birinshi sessiiasynyń mindetterin iske asyrýǵa baǵyttalǵan naqty usynystardy ázirleýge negiz bolady.
