Aqtaýdaǵy №1 mektepte dene shynyqtyrý sabaǵynda 10 jáne 11-synyp oqýshylary arasynda tóbeles shyqqan. Oqiǵa 5 qazanda bolǵan. Eki 10-synyp oqýshysy jedel járdemniń qabyldaý bólimine jetkizilip, bireýi aýrýhanaǵa jatqyzylǵan, dep habarlaidy dalanews.kz lada.kz-ke siltep.
Zardap shekken oqýshylardyń biriniń anasynyń aitýynsha, uly synyptastarymen fýtbol oinap júrgen. Sol kezde 11-synyp oqýshylary da alańda bolǵan. Oiyn barysynda onyń uly men joǵary synyp oqýshylarynyń biri sózge kelip qalǵan. Áiel uly birinshi bolyp soqqy jasaǵanyn joqqa shyǵarmaidy. Alaida buǵan deiin 11-synyp oqýshysy balasyn arandatyp, qorqytqanyn aitady.
Balanyń anasynyń sózinshe, keiin tóbeleske basqa 11-synyp oqýshylary da qosylyp, ulyn top bolyp urǵan. Oǵan arasha túsken synyptasy da soqqy alǵan. Onyń sózinshe, tóbeles kezinde dene shynyqtyrý muǵalimi sabaqta bolǵan, biraq bul jaitty toqtata almaǵan.
"Ulym tóbeles kezinde birneshe ret esinen tanyp qalǵan. Biraq olar toqtamaǵan", - dedi balanyń anasy.
Aqtaý qalalyq bilim bólimi málimetinshe, janjal joǵary synyp oqýshylary arasynda túsinispeýshilikten bastalyp, keiin tóbeleske ulasqan. Bilim bólimi ókilderi oqýshylardyń ata-analary balalardy tárbieleý jónindegi mindetin tiisinshe oryndamaǵany, sondai-aq, kámeletke tolmaǵandardyń buzaqylyǵy úshin ákimshilik jaýapkershilikke tartylǵanyn habarlady.
Material kámeletke tolmaǵandardyń isteri jónindegi komissiiaǵa joldanǵan. Jasóspirimder profilaktikalyq esepke qoiylǵan.
