Qazaqstanda kásibi áleýmettik jumysty zańnamalyq turǵydan bekitý usynyldy. Bul týraly Varshada ótip jatqan EQYU-nyń Adami ólshem jónindegi konferentsiiasynda «Ulttyq kásibi áleýmettik qyzmetkerler aliansy» RQB prezidenti Dinara Esimova málimdedi, dep habarlaidy dalanews.kz.
Onyń aitýynsha, 2025 jyly Alians memlekettik organdarmen birlesip, «Áleýmettik jumys týraly» zań jobasyn ázirlegen. Qujat Qazaqstannyń Áleýmettik kodeksin qaitalamaidy. Zań jobasy kásibi áleýmettik jumysty, áleýmettik qyzmetkerdiń mártebesin jáne osy baǵyttaǵy memlekettik organdar men uiymdardyń ózara is-qimyl tetikterin retteýge baǵyttalǵan.
«Osyǵan bailanysty Alians 2025 jyly ázirlengen «Áleýmettik jumys týraly» zań jobasy negizinde kásibi áleýmettik jumysty zańnamalyq turǵydan bekitý baǵytyndaǵy jumysty jalǵastyrý qajet dep sanaidy», – dedi Dinara Esimova.
Onyń sózinshe, mundai zań áleýmettik qyzmetkerdiń mártebesin kóterip qana qoimai, áleýmettik kómek kórsetý júiesiniń tiimdiligin arttyrýǵa jáne áleýmettik qoldaýǵa muqtaj qazaqstandyqtardyń kóbirek bóligin qamtýǵa múmkindik beredi.
«Zań áleýmettik qyzmetkerdiń mártebesin kóterip qana qoimai, áleýmettik kómek kórsetý júiesiniń tiimdiligin arttyryp, áleýmettik kómek alatyn qazaqstandyqtardyń sanyn kóbeitýge múmkindik beredi», – dedi ol.
Balalarǵa kásibi áleýmettik kómek qajet
Dinara Esimova Qazaqstanda shamamen 7 mln bala bar ekenin atap ótti. Onyń pikirinshe, balalardyń máselelerin erte anyqtap, olarǵa der kezinde kómek kórsetý úshin kásibi áleýmettik qyzmetkerler jetkilikti bolýy kerek.
«Álemniń kóptegen óńirinde týý kórsetkishi tómendep jatqanymen, bizdiń elde bala týý deńgeii áli de joǵary. Osyǵan bailanysty eńbek naryǵynda kásibi áleýmettik qyzmetkerlerdiń úlesi de kóp bolýy kerek. Bala jalǵyzdyq, qoǵamnan oqshaýlaný, osaldyq nemese marginaldaný siiaqty máselelerge tap bolǵan kezde oǵan janynan tabylatyn maman qajet», – dedi ol.
Onyń aitýynsha, bul baǵytta Qazaqstanǵa bilikti áleýmettik qyzmetkerler men quqyq qorǵaý salasynyń mamandary qajet.
«Ol úshin Qazaqstanda áleýmettik jumys salasynda bilikti mamandardan turatyn myqty kásibi orta qalyptastyrý qajet. Sonymen qatar ozyq halyqaralyq tájiribeni engizip, akademiialyq yntymaqtastyqty nyǵaitý jáne Qazaqstanda kásibi áleýmettik jumystyń damýyna jaǵdai jasaý mańyzdy», – dedi Dinara Esimova.
Sonymen qatar Dinara Esimova «Ulttyq qor – balalarǵa» baǵdarlamasyn áleýmettik ádilettilikti qamtamasyz etýge baǵyttalǵan bastamalardyń biri retinde atady.
«Ádiletti memleket saiasaty aiasyndaǵy sheshimderdiń biri – «Ulttyq qor – balalarǵa» baǵdarlamasy. Bul – Qazaqstanda týǵan jáne Qazaqstan azamaty bolyp tabylatyn balalarǵa beriletin tólem. Qarajatty bilim alýǵa nemese turǵyn úi jaǵdaiyn jaqsartýǵa paidalanýǵa bolady. Bul bastama áleýmettik ádilettilik qaǵidattaryn júzege asyrýǵa jáne ár azamattyń bala kezinen bastap múmkindikterin keńeitýge baǵyttalǵan», – dedi Alians prezidenti.
