Qazaqstan da múshesi bolyp tabylatyn OPEK + elderi kelesi aida naryqtaǵy úlesin ulǵaitýǵa umtyla otyryp, munai óndirisi kólemin arttyrýǵa ózara kelisti. Aldymen bul aqparatpen keshke Bloomberg bólisti. Kóp uzamai keshkisin OPEK+ elderiniń birlesken málimdemesi jariialandy, dep habarlaidy Dalanews.kz.
Bloomberg agenttiginiń málimetinshe, OPEK + elderi qazan aiynda óndiris kólemin taǵy ulǵaitý týraly sheshim qabyldady, óitkeni bul top baǵany qorǵaýdyń ornyna naryqtaǵy úlesin ulǵaitýǵa umtylyp, buǵan deiin ustanyp kelgen saiasatty ózgertýge nietti.
Rasynda, OPEK+ elderiniń birlesken málimdemesinde kórsetilgendei, Qazaqstan, Saýd Arabiiasy, Resei, Irak, BAÁ, Kýveit, Aljir jáne Oman munai óndirisi boiynsha josparlaryna túzetýler engizgen.
"Álemdik ekonomikanyń turaqty perspektivalaryna jáne munai qorynyń tómendigin kórsetetin naryqtyń qolaily irgeli kórsetkishterine bailanysty halyqaralyq uiymnyń segiz qatysýshy eli munai óndirisi kólemin táýligine 137 myń barrelge arttyrý jóninde sheshim qabyldady. Bul sheshim 2025 jyldyń qazan aiynda júzege asyrylady", delingen resmi qujatta.
Qazan aiyndaǵy óndiristiń ulǵaiýy 2026 jyldyń sońyna josparlanǵan táýligine 1,66 million barrelge deiin qysqartý sharalaryn qalpyna keltirýge bastama bolmaq.
"Óndiris kóleminiń bul jolǵy artýy OPEK pen onyń seriktesteriniń túbegeili betburysqa bet alǵanyn naqtylai alady. Sońǵy ailarda top munai naryqtaryn dúr silkindirip, josparlanǵan merzimnen bir jyl buryn 2,2 million barrelge toqtatylǵan óndiristi qalpyna keltirdi, sóitip alda oryn almaq profitsitke qaramastan naryqtaǵy óz úlesterin qalpyna keltirýge umtylýda. Óndiris kólemin odan saiyn arttyrý AQSh prezidenti Donald Trampqa maidai jaǵýy múmkin. Óitkeni ol arab elderin infliatsiiany tejeý jáne Ýkrainaǵa qarsy soǵysty toqtatý úshin Reseige qysym jasaý quraly retinde munai baǵasyn tómendetýge birneshe ret shaqyrǵan bolatyn", dep jazady Bloomberg.
Resmi qujat qosymshasyndaǵy tómendegi keste málimetine súiensek, Qazaqstan qazan aiynda OPEK + sheńberinde munai óndirisi kólemin táýligine 1,556 mln barrelge deiin arttyra alady.
OPEK-tegi barlyq segiz el bul shara ózderiniń ótemaqy boiynsha tólemdi jedeldetýge múmkindik beretinin naqtylaidy.
Aita ketsek, ótken aptada ǵana QR energetika ministrligi elimizde tamyz aiynda munai óndirý kólemi 2%-ǵa artqany týraly aqparatty teriske shyǵarǵan bolatyn. Energetika ministrligi tamyzda Qazaqstanda munai óndirý kólemi táýligine 1,712 mln barreldi quraǵanyn naqtylaidy. Bul kórsetkish shilde aiymen salystyrǵanda táýligine 48 myń barrelge tómen.
"Energetika ministrligi "elimizde munai óndirý deńgeii tamyzda ótken aimen salystyrǵanda arta tústi" degen keibir buqaralyq aqparat quraldaryndaǵy aqparatty túbegeili joqqa shyǵarady", delingen 3 qyrkúiekte jariialanǵan ministrlik málimdemesinde.
