OPEK + elderi álemdik shikizat naryǵyndaǵy jaǵdaidy onlain-formatta talqylady. Kelissózder qorytyndysy boiynsha olar 1 sáýirden bastap munai óndirisin birtindep ulǵaita bastaityndaryn rastady. Olar bul máseleni ótken jyldyń jeltoqsanynda ózara kelisken, dep habarlaidy Dalanews.kz.
Táýligine igeriletin ortasha kólem 2,2 mln barreldi quraidy.
"Tiisinshe, óndiris kólemin birtindep ósirý sharasy naryq jaǵdaiyna bailanysty toqtatylýy nemese joiylýy múmkin. Mundai ikemdilik top úshin munai naryǵynyń turaqtylyǵyn qamtamasyz etýge múmkindik beredi", delingen baspasóz habarlamasynda.
Sondai-aq, OPEK+ músheleri 2024 jyldyń qańtarynan bastap artyq óndirilgen munai ónimderiniń kez kelgen kólemin óteýge kelisti. Bul mindettemeni 2026 jyldyń maýsymyna deiin tolyqtai atqarý qajet.
Buǵan deiin keibir salalyq BAQ óz derekkózderine silteme jasai otyryp, OPEK+ sáýir aiyna josparlanǵan munai óndirisi boiynsha sheshimdi taǵy keiinge qaldyrý múmkindigin qarastyryp jatqanyn jazǵan bolatyn.
Sonymen qatar OPEK 2025 jyldyń sáýirinen 2026 jyldyń qyrkúiegine deiin óndiristi erikti túrde qysqartýshy segiz eldiń munai óndiris kólemin sipattaityn kesteni usyndy.
- Resei úshin 2025 jyldyń sáýirinen bastap táýligine 9,004 million barrel óndirý josparlanǵan, al bul kólem 2026 jyldyń qyrkúiegine deiin birtindep 9,449 million barrelge deiin ósedi.
- Saýd Arabiiasynyń óndirisi 2026 jyly táýligine 9,034 million barrelden 9,978 millionǵa deiin ósedi.
- BAÁ bir jyl ishinde óndirisin 2,938 millionnan 3,375 millionǵa deiin,
- Irak 4,012 millionnan 4,22 millionǵa deiin,
- Kýveit 2,421 millionnan 2,548 millionǵa deiin,
- Qazaqstan 1,473 millionnan 1,55 millionǵa deiin,
- Aljir 911 myńnan 959 myńǵa deiin,
- Oman 761 myńnan 801 myń barrelge deiin ulǵaitpaq.
OPEK + kelisimi sheńberinde óz qatysýshylary úshin munai óndirý boiynsha kvotalar belgileidi. Ótken jyly kvotaǵa qatyspaǵan Iran, Venesýela jáne Liviiany eseptemegende, óndiristiń jalpy shekti deńgeii táýligine shamamen 39,425 million barreldi qurady.
Buǵan deiin saitymyzda "Qazaqstan OPEK+ aldynda munai óndirisi kólemin nege arttyrǵanyn túsindirdi" degen maqala jariialanǵan bolatyn.
