وپەك + ەلدەرى الەمدىك شيكىزات نارىعىنداعى جاعدايدى ونلاين-فورماتتا تالقىلادى. كەلىسسوزدەر قورىتىندىسى بويىنشا ولار 1 ساۋىردەن باستاپ مۇناي ءوندىرىسىن بىرتىندەپ ۇلعايتا باستايتىندارىن راستادى. ولار بۇل ماسەلەنى وتكەن جىلدىڭ جەلتوقسانىندا ءوزارا كەلىسكەن، دەپ حابارلايدى Dalanews.kz.
تاۋلىگىنە يگەرىلەتىن ورتاشا كولەم 2،2 ملن باررەلدى قۇرايدى.
"تيىسىنشە، ءوندىرىس كولەمىن بىرتىندەپ ءوسىرۋ شاراسى نارىق جاعدايىنا بايلانىستى توقتاتىلۋى نەمەسە جويىلۋى مۇمكىن. مۇنداي يكەمدىلىك توپ ءۇشىن مۇناي نارىعىنىڭ تۇراقتىلىعىن قامتاماسىز ەتۋگە مۇمكىندىك بەرەدى"، دەلىنگەن باسپا ءسوز حابارلاماسىندا.
سونداي-اق، وپەك+ مۇشەلەرى 2024 جىلدىڭ قاڭتارىنان باستاپ ارتىق وندىرىلگەن مۇناي ونىمدەرىنىڭ كەز كەلگەن كولەمىن وتەۋگە كەلىستى. بۇل مىندەتتەمەنى 2026 جىلدىڭ ماۋسىمىنا دەيىن تولىقتاي اتقارۋ قاجەت.
بۇعان دەيىن كەيبىر سالالىق ب ا ق ءوز دەرەككوزدەرىنە سىلتەمە جاساي وتىرىپ، وپەك+ ءساۋىر ايىنا جوسپارلانعان مۇناي ءوندىرىسى بويىنشا شەشىمدى تاعى كەيىنگە قالدىرۋ مۇمكىندىگىن قاراستىرىپ جاتقانىن جازعان بولاتىن.
سونىمەن قاتار وپەك 2025 جىلدىڭ ساۋىرىنەن 2026 جىلدىڭ قىركۇيەگىنە دەيىن ءوندىرىستى ەرىكتى تۇردە قىسقارتۋشى سەگىز ەلدىڭ مۇناي ءوندىرىس كولەمىن سيپاتتايتىن كەستەنى ۇسىندى.
- رەسەي ءۇشىن 2025 جىلدىڭ ساۋىرىنەن باستاپ تاۋلىگىنە 9،004 ميلليون باررەل ءوندىرۋ جوسپارلانعان، ال بۇل كولەم 2026 جىلدىڭ قىركۇيەگىنە دەيىن بىرتىندەپ 9،449 ميلليون باررەلگە دەيىن وسەدى.
- ساۋد ارابياسىنىڭ ءوندىرىسى 2026 جىلى تاۋلىگىنە 9،034 ميلليون باررەلدەن 9،978 ميلليونعا دەيىن وسەدى.
- ءباا ءبىر جىل ىشىندە ءوندىرىسىن 2،938 ميلليوننان 3،375 ميلليونعا دەيىن،
- يراك 4،012 ميلليوننان 4،22 ميلليونعا دەيىن،
- كۋۆەيت 2،421 ميلليوننان 2،548 ميلليونعا دەيىن،
- قازاقستان 1،473 ميلليوننان 1،55 ميلليونعا دەيىن،
- الجير 911 مىڭنان 959 مىڭعا دەيىن،
- ومان 761 مىڭنان 801 مىڭ باررەلگە دەيىن ۇلعايتپاق.
وپەك + كەلىسىمى شەڭبەرىندە ءوز قاتىسۋشىلارى ءۇشىن مۇناي ءوندىرۋ بويىنشا كۆوتالار بەلگىلەيدى. وتكەن جىلى كۆوتاعا قاتىسپاعان يران، ۆەنەسۋەلا جانە ليۆيانى ەسەپتەمەگەندە، ءوندىرىستىڭ جالپى شەكتى دەڭگەيى تاۋلىگىنە شامامەن 39،425 ميلليون باررەلدى قۇرادى.
بۇعان دەيىن سايتىمىزدا "قازاقستان وپەك+ الدىندا مۇناي ءوندىرىسى كولەمىن نەگە ارتتىرعانىن ءتۇسىندىردى" دەگەن ماقالا جاريالانعان بولاتىن.
