Jıynǵa qatysqan oblys ákimi J.Túımebaev barsha medısına qyzmetkerlerin kásibı merekelerimen quttyqtap, óz salasynda abyroıly eńbek etken qyzmetkerlerge óńirdegi shıpajaılarǵa 20 joldama men televızor syılady.
Sonymen qosa is-shara barysynda sala úzdikteri oblys ákiminiń, oblystyq máslıhat pen «Nur Otan» partıasynyń Qurmet gramotalarymen jáne Alǵys hattarymen marapattaldy. Budan bólek, 11 medısına salasynyń qyzmetkerine «Eń úzdik medbıke» nomınasıasy berilip, baǵaly syılyqtar tabystaldy. Bul kúni elýge jýyq azamat aıryqsha qurmetke ıe boldy.
Janseıit Túımebaev elimizdiń álemdegi órkenıetti 30 eldiń qataryna qosylýdaǵy «Densaýlyq» memlekettik baǵdarlamasyn júzege asyrýda sala qyzmetkerleriniń eńbegin aıryqsha atap ótti.
– Densaýlyq saqtaý salasynda eńbek etetin qyzmetkerlerdiń sany jaǵynan eń kóbi meıirbıkeler bolyp tabylady. Sondyqtan da Sizderdiń halyq saýlyǵyna qosyp jatqan úlesterińiz orasan. Búgingi tańda óńirimizdegi 110 medısınalyq uıymda medbıkelermen qamtamasyz etý jaǵy 86,8 paıyzdy quraıdy, bul elimiz boıynsha eń úlken kórsetkish. Búginde óńirdegi medısına mekemelerdiń materıaldyq-tehnıkalyq jabdyqtalýy anaǵurlym jaqsardy. Zamanaýı qural-jabdyqtar men qondyrǵylar tek oblys ortalyǵynda ǵana emes, aýdandar men qalalarda da ornatylýda, ‒ dedi óńir basshysy.
Búginde oblystaǵy medısınalyq uıymda 25 myńnan astam orta býyn qyzmetkerleri halyqqa qyzmet kórsetedi. Halyqtyń densaýlyǵyn saqtaý syndy asyl mindet memlekettik saıasattyń negizi bolyp otyr. Osy baǵytta ótken jyly 4391 medısına qyzmetker biliktiligin arttyryp, tájirıbe jınaqtady. Onyń ishinde shet memleketke barǵandar da bar. Al osy jyly sala qyzmetkerleriniń biliktiligin arttyrý maqsatynda Túrkıa memleketine joldama beriledi dep josparlanyp otyr.
Aq halatty abzal jandardyń merekesi konserttik baǵdarlamamen jalǵasyn tapty.
OQO ákiminiń baspasóz qyzmeti
