جيىنعا قاتىسقان وبلىس اكىمى ج.تۇيمەبايەۆ بارشا مەديسينا قىزمەتكەرلەرىن كاسىبي مەرەكەلەرىمەن قۇتتىقتاپ، ءوز سالاسىندا ابىرويلى ەڭبەك ەتكەن قىزمەتكەرلەرگە وڭىردەگى شيپاجايلارعا 20 جولداما مەن تەليەۆيزور سىيلادى.
سونىمەن قوسا ءىس-شارا بارىسىندا سالا ۇزدىكتەرى وبلىس اكىمىنىڭ، وبلىستىق ءماسليحات پەن «نۇر وتان» پارتياسىنىڭ قۇرمەت گراموتالارىمەن جانە العىس حاتتارىمەن ماراپاتتالدى. بۇدان بولەك، 11 مەديسينا سالاسىنىڭ قىزمەتكەرىنە «ەڭ ۇزدىك مەدبيكە» نوميناسياسى بەرىلىپ، باعالى سىيلىقتار تابىستالدى. بۇل كۇنى ەلۋگە جۋىق ازامات ايرىقشا قۇرمەتكە يە بولدى.
جانسەيىت تۇيمەبايەۆ ەلىمىزدىڭ الەمدەگى وركەنيەتتى 30 ەلدىڭ قاتارىنا قوسىلۋداعى «دەنساۋلىق» مەملەكەتتىك باعدارلاماسىن جۇزەگە اسىرۋدا سالا قىزمەتكەرلەرىنىڭ ەڭبەگىن ايرىقشا اتاپ ءوتتى.
– دەنساۋلىق ساقتاۋ سالاسىندا ەڭبەك ەتەتىن قىزمەتكەرلەردىڭ سانى جاعىنان ەڭ كوبى مەيىربيكەلەر بولىپ تابىلادى. سوندىقتان دا سىزدەردىڭ حالىق ساۋلىعىنا قوسىپ جاتقان ۇلەستەرىڭىز وراسان. بۇگىنگى تاڭدا وڭىرىمىزدەگى 110 مەديسينالىق ۇيىمدا مەدبيكەلەرمەن قامتاماسىز ەتۋ جاعى 86،8 پايىزدى قۇرايدى، بۇل ەلىمىز بويىنشا ەڭ ۇلكەن كورسەتكىش. بۇگىندە وڭىردەگى مەديسينا مەكەمەلەردىڭ ماتەريالدىق-تەحنيكالىق جابدىقتالۋى اناعۇرلىم جاقساردى. زاماناۋي قۇرال-جابدىقتار مەن قوندىرعىلار تەك وبلىس ورتالىعىندا عانا ەمەس، اۋداندار مەن قالالاردا دا ورناتىلۋدا، ‒ دەدى ءوڭىر باسشىسى.
بۇگىندە وبلىستاعى مەديسينالىق ۇيىمدا 25 مىڭنان استام ورتا بۋىن قىزمەتكەرلەرى حالىققا قىزمەت كورسەتەدى. حالىقتىڭ دەنساۋلىعىن ساقتاۋ سىندى اسىل مىندەت مەملەكەتتىك ساياساتتىڭ نەگىزى بولىپ وتىر. وسى باعىتتا وتكەن جىلى 4391 مەديسينا قىزمەتكەر بىلىكتىلىگىن ارتتىرىپ، تاجىريبە جيناقتادى. ونىڭ ىشىندە شەت مەملەكەتكە بارعاندار دا بار. ال وسى جىلى سالا قىزمەتكەرلەرىنىڭ بىلىكتىلىگىن ارتتىرۋ ماقساتىندا تۇركيا مەملەكەتىنە جولداما بەرىلەدى دەپ جوسپارلانىپ وتىر.
اق حالاتتى ابزال جانداردىڭ مەرەكەسى كونسەرتتىك باعدارلامامەن جالعاسىن تاپتى.
وقو اكىمىنىڭ باسپا ءسوز قىزمەتى
