– الدىمەن بارشاڭىزدى كەلە جاتقان جاڭا جىل مەرەكەسىمەن قۇتتىقتايمىن. بۇگىن قاسيەتتى تۇركىستان تورىندە قۋانىشتى ساتتە جولىعىپ تۇرمىز. ەلىمىزدىڭ باستى بايلىعى – ادام جانە ونىڭ دەنساۋلىعى. مەملەكەت باسشىسى قاسىم-جومارت كەمەل ۇلى قازاقستان حالقىنا جولداۋىندا دەنساۋلىق ساقتاۋ سالاسىنا ەرەكشە توقتالىپ، مەديسينالىق نىساناردى ارنايى تەحنيكامەن قامتۋدى تاپسىرعان بولاتىن.
وسى باعىتتا تۇركىستان وبلىسىندا دەنساۋلىق ساقتاۋ ينفراقۇرىلىمىن دامىتۋ ءۇشىن 24 دەنساۋلىق ساقتاۋ نىسانىنىڭ قۇرىلىسى جۇرگىزىلىپ جاتىر. ونىڭ ىشىندە بيىل 18 نىسان ەل يگىلىگنە بەرىلەتىن بولادى. باسىم بولىگى تاپسىرىلىپ ۇلگەردى.
بۇدان بولەك، 2024 جىلعا «اۋىلدا دەنساۋلىق ساقتاۋدى جاڭعىرتۋ» ۇلتتىق پيلوتتىق جوباسى اياسىندا وبلىسىمىزدا 49 دەنساۋلىق ساقتاۋ نىسانىن سالۋ جوسپارلاندى. حالىق دەنساۋلىعى ءۇشىن، ونىڭ ىشىندە ءبىرىنشى كەزەكتە انا مەن بالا، جانساقتاۋ، وتا جاساۋ قىزمەتتەرىن كۇشەيتۋ ماقساتىندا وبلىسىمىزداعى مەديسينالىق ۇيىمداردىڭ ماتەريالدىق-تەحنيكالىق بازاسى سوڭعى زاماناۋي مەديسينالىق تەحنيكالارمەن جابدىقتالۋدا.
بۇگىن وبلىس اۋماعىن تولىق جەدەل جاردەم قىزمەتىمەن قامتاماسىز ەتۋ ماقساتىندا تاعى 75 كولىكتى سىزدەرگە تابىستاعالى تۇرمىز. پايدالانۋعا بەرىلىپ وتىرعان سانيتارلىق اۆتوكولىكتەر ەل يگىلىگىنە قىزمەت ەتىپ، اۋدان-قالا تۇرعىندارىنا ساپالى مەديسينالىق قىزمەتتەر كورسەتە بەرسىن. وتباسىلارىڭىزعا اماندىق، دەندەرىڭىزگە ساۋلىق، ىستەرىڭىزگە تابىس تىلەيمىن! – دەدى دارحان ساتىبالدى.
جاڭادان تاپسىرىلعان «Hyundai i30» ماركالى 75 سانيتارلىق اۆتوكولىكتەرى زاماناۋي مەديسينالىق قۇرال-جابدىقتارمەن قامتىلعان. وعان 1،3 ملرد. تەڭگە بولىنگەن. اۆتوكولىكتەر 17 اۋدان، قالاداعى مەديسينالىق ۇيىمدار مەن وبلىستىق جەدەل جاردەم ستانسياسىنا جانە وبلىستىق اۋرۋحانالارعا بەرىلدى. وڭىردە مەديسينا سالاسىن دامىتۋ جۇمىستارى جالعاسادى.
[caption id="attachment_96588" align="aligncenter" width="1000"]
default[/caption]
ايتا كەتەيىك، جەدەل مەديسينالىق جاردەم ستانسياسى ديسپەچەرى قابىلداعان شاقىرتۋلار 4 (ءتورت) جەدەلدىلىك ساناتىنا بولىنەدى. اتاپ ايتساق، ومىرىنە تىكەلەي ءقاۋىپ توندىرەتىن، جەدەل مەديسينالىق كومەك كورسەتۋدى قاجەت ەتەتىن پاسيەنتتىڭ جاي-كۇيىندە ءبىرىنشى، ومىرىنە مەديسينالىق كومەك كورسەتۋسىز الەۋەتتى ءقاۋىپ توندىرەتىن پاسيەنتتىڭ جاي-كۇيىندە ەكىنشى، دەنساۋلىعىنا مەديسينالىق كومەك كورسەتۋسىز الەۋەتتى ءقاۋىپ توندىرەتىن پاسيەنتتىڭ جاي-كۇيىندە ءۇشىنشى، سونداي-اق ءجىتى اۋرۋىنان نەمەسە سوزىلمالى اۋرۋىنىڭ اسقىنۋىنان تۋىنداعان، اعزالار مەن جۇيەلەردىڭ كەنەتتەن بولعان جانە ايقىن كورىنەتىن بۇزىلۋلارىنسىز پاسيەنتتىڭ ءومىرى مەن دەنساۋلىعىنا تىكەلەي جانە الەۋەتتى ءقاۋىپ توندىرمەيتىن پاسيەنتتىڭ جاي-كۇيىندە ءتورتىنشى جەدەلدىلىك ساناتىندا شاقىرىلادى.
1، 2، 3-جەدەلدىلىك ساناتتارىنىڭ شاقىرتۋلارى كەلىپ تۇسكەن كەزدە جمجس ديسپەچەرى اۆتوماتتى باسقارۋ جۇيەسى ارقىلى شاقىرتۋلاردى جمجس فەلدشەرلىك جانە مامانداندىرىلعان (دارىگەرلىك) بريگادالارىنا بەرەدى. 4-جەدەلدىلىك ساناتىنىڭ شاقىرتۋلارى كەلىپ تۇسكەن كەزدە جمكس ديسپەچەرى اۆتوماتتى باسقارۋ جۇيەسى ارقىلى شاقىرتۋلاردى مەديسينالىق سانيتاريالىق العاشقى كومەك كورسەتەتىن دەنساۋلىق ساقتاۋ ۇيىمى جانىنداعى جەدەل مەديسينالىق كومەك بولىمشەسىنىڭ فەلدشەرلىك جانە مامانداندىرىلعان (دارىگەرلىك) بريگادالارىنا بەرەدى. شاقىرتۋدى قابىلداعان ساتتەن باستاپ، پاسيەنتتىڭ تۇرعان جەرىنە دەيىن جەتۋ 1-جەدەلدىلىك ساناتى ون مينۋتقا دەيىنگى، 2-جەدەلدىلىك ساناتى ون بەس مينۋتقا دەيىنگى، 3-جەدەلدىلىك ساناتى وتىز مينۋتقا دەيىنگى، 4-جەدەلدىلىك ساناتى الپىس مينۋتقا دەيىنگى ۋاقىتتى قۇرايدى.
