Ońtústikke tájiribe almasý úshin Batystan delegatsiia keldi
BQO ákiminiń birinshi orynbasary Arman Óteǵulov bastaǵan topty búgin OQO J.Túimebaev qabyldap, óńirde atqarylyp jatqan jumystarǵa toqtalyp ótti.
– Ońtústik Qazaqstan negizi agrarly aimaq bolyp keledi. Munda aýyl sharýashylyq pen shaǵyn orta kásipkerlik salasy jolǵa qoiylǵan. Sonymen qatar áleýeti mol 11 inýdstrialdy aimaǵymyz bolsa, Shymkent qalasynyń ózinde jeńil jáne aýyr ónerkásipter ornalasqan úsh indýstrialdy aimaq bar. Jáne de respýblikadaǵy farmatsevtika klasteri damyǵan birden-bir aimaq osy Ońtústik Qazaqstan bolyp tabylady, – dedi ákim.
Quramynda kásipkerler men sharýa qojalyqtarynyń ókilderi men aýyl ákimderi bar 30-dan astam batysqazaqstandyqtar óńirdegi iri sharýa qojalyqtardyń jumysymen tanysyp, kooperativterdi qurý boiynsha tájiribe almaspaq.
Óz kezeginde sóz alǵan BQO ákiminiń birinshi orynbasary A.Óteǵulov búgingi resmi sapar oblys ákimi A.Kólginovtyń ózge óńirlerden tájiribe almasý tapsyrmasy aiasynda uiymdastyrylyp otyrǵandyǵyn aityp, agroónerkásip baǵyty damyǵan bul aimaqtan úirenerimiz kóp dep bilemin dedi.
– Batys Qazaqstanda mal sharýashylyǵy damyǵan. Búginde asyl tuqymdy mal sharýashylyǵy men et eksportynyń áleýetin óristetýdemiz. Máselen, ótken jyly Ońtústiktegi mal soiý beketterine 7800 bas mal jiberdik. Sondai-aq, osy oblystaǵy «Qaiyp Ata» sharýa qojalyǵy mal basyn alýǵa qyzýǵýshylyq tanytyp otyr. Resei shekarasymen shektesken bizdiń oblys ótken jyly 2100 tonna et eksporttady, – dedi A.Óteǵulov.
Ońtústik Qazaqstanǵa eki kúndik jumys saparymen kelgen delegattar agroónerkásip keshenin damytýda birlese jumys atqarý maqsatynda Ordabasy men Tóle bi aýdandaryndaǵy birqatar sharýa qojalyqtaryn aralap, jumysymen tanysýda. Sonymen qatar, óńir kásipkerlerimen kezdesý uiymdastyrylyp, ózara kelissózder júrgizý josparlanýda.
OQO ákiminiń baspasóz qyzmeti
