10-11 shilde kúnderi Mongolıanyń qazaqtar qonystanǵan Baıan-Ólgıı aımaǵynda tolassyz jańbyr jaýyp, sonyń saldarynan aımaq ortalyǵyna sel túsken bolatyn. Sol selden zardap shekken 300 otbasynyń turǵyny – 700 adam baspanasyz qalǵan edi. Búgin osy jandarǵa Ońtústik Qazaqstan oblysynan arnaıy kómek kerýeni attandy – dep jazady BAQ.kz portaly.

Bul týraly ákimdiktiń baspasóz qyzmeti habarlady.

Buǵan deıin qazaqstandyq belsendiler arnaıy qor quryp, atajurttan alystaǵy qandastarǵa kómek qolyn sozǵan bolatyn. Alystaǵy qandastarǵa alǵashqy kómek ótken aptada Astanadan joldanǵan. Qoǵam belsendileri Aıatjan Ahmetjan men Amangeldi Qurmetuly óz qoldarymen tapsyryp berý úshin Baıan-Ólgııge jol tartqan.

Al búgin shyraıly Shymkentten attanǵan kerýen oblys kásipkerleriniń demeýshiligimen 7 tonnaǵa jýyq un, 1 tonna makaron, 1000 banki marınadtalǵan qıar, 5000 dana shulyq jáne taǵy basqa da azyq-túlik taýarlardy artyp ketti.

Sonymen birge, eriktilerdiń oblys turǵyndarynan jınaǵan 3 mln. teńgesi selden zardap shekken eń turmysy nashar degen 5 otbasyǵa turǵyn-úı salý úshin qurylys materıaldary satyp alynady dep josparlanǵan.

Gýmanıtarlyq kómekti Baıan-Ólgeı aımaǵyna «Bizben birge» qoǵamdyq qorynyń tóraǵasy A.Ańdabaev ózi tabystap qaıtatyn bolady.

Atajurttan jyraqtaǵy qandastardyń jaǵdaıyna alańdaǵan oblys ákimi B.Atamqulov óz tarapynan qoldaý kórsetse, oblys ákimdiginiń qyzmetkerleri bir kúndik jalaqylaryn qandastarymyz úshin aýdarǵan. Jáne bir aıta keterligi ákimshilik kedendik qujattardy rásimdeýge, Baıan-Ólgııge aparatyn júkti tıeıtin kólik máselesin jáne basqa da uıymdastyrýshylyq jumystarǵa qoldaý kórsetti.