10-11 شىلدە كۇندەرى مونگوليانىڭ قازاقتار قونىستانعان بايان-ولگيي ايماعىندا تولاسسىز جاڭبىر جاۋىپ، سونىڭ سالدارىنان ايماق ورتالىعىنا سەل تۇسكەن بولاتىن. سول سەلدەن زارداپ شەككەن 300 وتباسىنىڭ تۇرعىنى – 700 ادام باسپاناسىز قالعان ەدى. بۇگىن وسى جاندارعا وڭتۇستىك قازاقستان وبلىسىنان ارنايى كومەك كەرۋەنى اتتاندى – دەپ جازادى BAQ.kz پورتالى.

بۇل تۋرالى اكىمدىكتىڭ باسپا ءسوز قىزمەتى حابارلادى.

بۇعان دەيىن قازاقستاندىق بەلسەندىلەر ارنايى قور قۇرىپ، اتاجۇرتتان الىستاعى قانداستارعا كومەك قولىن سوزعان بولاتىن. الىستاعى قانداستارعا العاشقى كومەك وتكەن اپتادا استانادان جولدانعان. قوعام بەلسەندىلەرى اياتجان احمەتجان مەن امانگەلدى قۇرمەت ۇلى ءوز قولدارىمەن تاپسىرىپ بەرۋ ءۇشىن بايان-ولگييگە جول تارتقان.

ال بۇگىن شىرايلى شىمكەنتتەن اتتانعان كەرۋەن وبلىس كاسىپكەرلەرىنىڭ دەمەۋشىلىگىمەن 7 تونناعا جۋىق ۇن، 1 توننا ماكارون، 1000 بانكى مارينادتالعان قيار، 5000 دانا شۇلىق جانە تاعى باسقا دا ازىق-تۇلىك تاۋارلاردى ارتىپ كەتتى.

سونىمەن بىرگە، ەرىكتىلەردىڭ وبلىس تۇرعىندارىنان جيناعان 3 ملن. تەڭگەسى سەلدەن زارداپ شەككەن ەڭ تۇرمىسى ناشار دەگەن 5 وتباسىعا ءتۇرعىن-ۇي سالۋ ءۇشىن قۇرىلىس ماتەريالدارى ساتىپ الىنادى دەپ جوسپارلانعان.

گۋمانيتارلىق كومەكتى بايان-ولگەي ايماعىنا «بىزبەن بىرگە» قوعامدىق قورىنىڭ ءتوراعاسى ا.اڭدابايەۆ ءوزى تابىستاپ قايتاتىن بولادى.

اتاجۇرتتان جىراقتاعى قانداستاردىڭ جاعدايىنا الاڭداعان وبلىس اكىمى ب.اتامقۇلوۆ ءوز تاراپىنان قولداۋ كورسەتسە، وبلىس اكىمدىگىنىڭ قىزمەتكەرلەرى ءبىر كۇندىك جالاقىلارىن قانداستارىمىز ءۇشىن اۋدارعان. جانە ءبىر ايتا كەتەرلىگى اكىمشىلىك كەدەندىك قۇجاتتاردى راسىمدەۋگە، بايان-ولگييگە اپاراتىن جۇكتى تيەيتىن كولىك ماسەلەسىن جانە باسقا دا ۇيىمداستىرۋشىلىق جۇمىستارعا قولداۋ كورسەتتى.