Ońtústik Koreia Respýblikasynan bir top dáriger Jetisý oblysynyń Taldyqorǵan qalalyq kópsalaly aýrýhanasyna arnaiy keldi. Oblystyq densaýlyq saqtaý basqarmasynyń málimetinshe, bul – Hionde gospitali dárigerleriniń Jetisý óńirine osymen 4-shi ret kelýi. Gospital direktory Kim Bý Sop bastaǵan mamandar bes kún ishinde 1000-nan astam turǵyndy tekserýden ótkizip, travmatologiia men hirýrgiia baǵytynda 33 ota jasady.
Hionde gospitalynyń direktory Kim Bý Soptyń aitýynsha, arnaiy top quramynda gospitaldiń jáne «Chýng-Ang» ýniversitetiniń meditsinalyq ortalyǵynyń neirohirýrg, hirýrg, terapevt, hirýrg-travmatolog jáne shuǵyl meditsinalyq kómek kórsetetin 50 shaqty mamany bar. Olar mundai qaiyrymdylyq aktsiiasyn jylda ótkizetinderin aitady.
– 1930 jyldary Qazaqstanǵa jer aýdarylyp kelgen korei halqyna ashtyq kezinde qazaqtar úlken kómek kórsetti. Qazaqtarǵa alǵys bildirý, eki el arasyndaǵy dostyqty nyǵaitý úshin biz jyl saiyn kelip, dárigerlermen tájiribe almasyp, tegin tekserýler men operatsiialar jasaimyz, – dedi gospital direktory.
2018 jyly oblys ákimdigi, Qazaqstan halyqtary assambleiasy jáne Qazaqstandaǵy korei halqy assotsiatsiiasy birlesip Hionde gospitalimen Jetisý óńiriniń turǵyndaryn jyl saiyn meditsinalyq tegin tekserýden ótkizý týraly memorandýmǵa qol qoiǵan bolatyn. Memorandýmǵa qol qoiylǵan sátten bastap sheteldik mamandar tize, jambas jáne basqa býyndardy aýystyrý boiynsha 50-den astam ota jasady. Sonymen qatar Hionde klinikasynyń esebinen elimizdiń dárigerleri Ońtústik Koreiada bilim alýda.
Taldyqorǵan qalalyq kópsalaly aýrhanasynyń direktory Asqar Sadyqov korei eliniń dárigerleri travmatologiialyq, hirýrgiialyq operatsiialar jasaýmen qatar, tájiribe almasyp, jańa dári-dármekter men meditsinalyq jabdyqtardy engizý týraly aqparatpen almasyp otyratynyn aitty.
– 2018 jyldan bastap bizdiń birqatar qyzmetkerlerimiz jáne birneshe aýdandyq aýrýhanalardyń mamandary Hionde gospitalinde biliktilikti arttyrý kýrstaryna qatysty. 4 jyldan beri mamandar eriktilermen, jetekshi professorlarmen jáne klinikanyń direktorymen birlesip bizdiń aýrýhanaǵa kelip, konsýltatsiialyq-diagnostikalyq kómek kórsetip keledi. Sondai-aq birqatar hirýrgiia jáne travmatologiia salasy boiynsha otalar jasaldy, – dedi Asqar Sadyqov.
Osy sapar aiasynda Jetisý oblysynyń ákimdigi men Koreia Respýblikasy Hionde gospitali jáne «Chýng-Ang» ýniversitetiniń meditsinalyq ortalyǵy halyq densaýlyǵyn jaqsartý, eki el arasyndaǵy yntymaqtastyqty nyǵaitý maqsatynda kelisim memorandýmyna qol qoidy. Memorandým negizinde eki eldiń mamandary travmatologiia, hirýrgiia jáne radiologiia salalary boiynsha birlese jumys atqaratyn bolady.
