Ońtústik Qazaqstan oblysynda jyl saıyn áleýmettik mańyzy bar ónimderdiń baǵasynyń ósýin shekteý maqsatynda turaqtandyrý qorynyń ónimderin  óńir turǵyndaryna tómen baǵamen satý qalyptasqan. Máselen, 2017 jyly «Azyq túlik kompanıasy» JSHS-na  6800 tonna áleýmettik mańyzdy taýarlar satyp alynsa, onyń 2232,5 tonnasy satylǵan.

Qordyń bıylǵy jumysymen tanysý úshin «Shymkent» áleýmettik-kásipkerlik korporasıasy» ulttyq kompanıasy» AQ enshiles uıymynyń «Azyq-túlik kompanıasy» JSHS azyq-túlik turaqtandyrý qorynyń saýda núktelerine oblys ákiminiń baspasóz qyzmeti BAQ ókilderine arnap baspasóz týryn uıymdastyrdy.

Aıta keterligi, turaqtandyrý qorynda kókónister sáýir aıynyń ortasyna deıin saqtalady. Jazǵy eginniń kelýine deıin jyl saıyn naryqta kókónisterdiń jetispeýshiligi jáne baǵanyń ósýi baıqalady. Qazirgi ýaqytta oblystyń turaqtandyrý qorynyń dúkenderindegi qalǵan taýar kólemi 4 884,3 tonnany quraıdy.

Al taýarlardyń satylý baǵasyna kelsek, kartoptyń 1 kelisi - 85 teńgeden, pıaz – 50 teńge, sábiz – 80 teńge, kúrish – 180 teńge, sıyr eti – 1390 teńge, qumsheker baǵasy 215 teńgeden satylýda. Osylaısha turaqtandyrý qory naryqtaǵy baǵadan tómen etip, halyqqa taýar usynyp keledi. Taýarlar «Fırkan» saýda jelisi, «Jibek joly», «Aına», «Alash», «Qyrǵy bazar», «Samal», «Qazybek», «Avto-Nur», «Barys», IP «Jaqsylyq» bazarlary men Shymkent qalasyndaǵy jármeńkeler arqyly satylýda.

Qazirgi ýaqytta oblysta áleýmettik mańyzy bar azyq-túlik taýarlarynyń baǵasynyń kúrt ósýi baıqalmaıdy.

 

OQO ákiminiń baspasóz qyzmeti