Qazaqstannyń Reseidegi elshisi Dáýren Abaev Ekaterinbýrgte ótken Halyqaralyq jastar festivalinde stýdentterge ómirde tabysqa jetýge kómektesetin úsh mańyzdy qaǵida týraly aitty, dep habarlaidy dalanews.kz.
Ol jastarǵa eń aldymen adamgershilik qasietti saqtaýdyń mańyzyn atap ótti.
«Ońbaǵan bolmańyzdar. Eger men jai ǵana “jaqsy adam bolyńdar” desem, ony kópshilik este saqtai qoimas. Sondyqtan basqalarǵa ziianyn tigizetin, jaǵymsyz adam bolmaý óte mańyzdy. Bul – bolashaqta durys jol tabýǵa kómektesetin basty qasietterdiń biri», – dedi elshi.
Dáýren Abaevtyń aitýynsha, ekinshi mańyzdy qaǵida – óz isiniń kásibi mamany bolý.
«Qandai salany tańdasańyz da, óz jumysyńyzdy jetik meńgerýińiz kerek. Kásibilik – tabystyń negizgi sharttarynyń biri», – dedi ol.
Sondai-aq elshi stýdenttik jyldardy tek oqýmen shektemeýge shaqyrdy. Onyń pikirinshe, jastar qoǵamdyq jumystarǵa aralasyp, sportpen shuǵyldanyp, jańa tanystyqtar ornatýǵa ýaqyt bólgeni jón. Óz tájiribesin mysalǵa keltirgen Abaev stýdent kezinde ýniversitettiń stýdenttik kásipodaq komitetin basqarǵanyn, sportpen ainalysyp, fýtbol oinaǵanyn aitty.
«Sonyń arqasynda oqýymdy aiaqtaǵan kezde tanystarym men bailanystarymnyń aýqymy áldeqaida keń boldy. Al tek sabaqpen ǵana ainalysqan qatarlastarymnyń múmkindigi shekteýli edi», – dedi ol.
Elshiniń sózinshe, stýdenttiń eń qundy resýrsy – ýaqyt. Sondyqtan oqý jyldaryn tek dáris pen emtihanǵa arnamai, jan-jaqty damýǵa paidalaný mańyzdy.
«Oqýdy bitirgennen keiin bos ýaqyt qazirgidei kóp bolmaidy. Sondyqtan stýdenttik kezeńdegi múmkindikterdi tiimdi paidalanǵan jón», – dedi Dáýren Abaev.
Eske salaiyq, qazirgi ýaqytta Dáýren Abaev Qazaqstannyń Reseidegi elshisi qyzmetin atqaryp júr. Ol bul qyzmetke 2023 jyldyń 3 shildesinde taǵaiyndalǵan edi.
