قازاقستاننىڭ رەسەيدەگٸ ەلشٸسٸ دەۋرەن اباەۆ ەكاتەرينبۋرگتە ٶتكەن حالىقارالىق جاستار فەستيۆالٸندە ستۋدەنتتەرگە ٶمٸردە تابىسقا جەتۋگە كٶمەكتەسەتٸن ٷش ماڭىزدى قاعيدا تۋرالى ايتتى, دەپ حابارلايدى dalanews.kz.
ول جاستارعا ەڭ الدىمەن ادامگەرشٸلٸك قاسيەتتٸ ساقتاۋدىڭ ماڭىزىن اتاپ ٶتتٸ.
«وڭباعان بولماڭىزدار. ەگەر مەن جاي عانا “جاقسى ادام بولىڭدار” دەسەم, ونى كٶپشٸلٸك ەستە ساقتاي قويماس. سوندىقتان باسقالارعا زييانىن تيگٸزەتٸن, جاعىمسىز ادام بولماۋ ٶتە ماڭىزدى. بۇل – بولاشاقتا دۇرىس جول تابۋعا كٶمەكتەسەتٸن باستى قاسيەتتەردٸڭ بٸرٸ», – دەدٸ ەلشٸ.
دەۋرەن اباەۆتىڭ ايتۋىنشا, ەكٸنشٸ ماڭىزدى قاعيدا – ٶز ٸسٸنٸڭ كەسٸبي مامانى بولۋ.
«قانداي سالانى تاڭداساڭىز دا, ٶز جۇمىسىڭىزدى جەتٸك مەڭگەرۋٸڭٸز كەرەك. كەسٸبيلٸك – تابىستىڭ نەگٸزگٸ شارتتارىنىڭ بٸرٸ», – دەدٸ ول.
سونداي-اق ەلشٸ ستۋدەنتتٸك جىلداردى تەك وقۋمەن شەكتەمەۋگە شاقىردى. ونىڭ پٸكٸرٸنشە, جاستار قوعامدىق جۇمىستارعا ارالاسىپ, سپورتپەن شۇعىلدانىپ, جاڭا تانىستىقتار ورناتۋعا ۋاقىت بٶلگەنٸ جٶن. ٶز تەجٸريبەسٸن مىسالعا كەلتٸرگەن اباەۆ ستۋدەنت كەزٸندە ۋنيۆەرسيتەتتٸڭ ستۋدەنتتٸك كەسٸپوداق كوميتەتٸن باسقارعانىن, سپورتپەن اينالىسىپ, فۋتبول ويناعانىن ايتتى.
«سونىڭ ارقاسىندا وقۋىمدى اياقتاعان كەزدە تانىستارىم مەن بايلانىستارىمنىڭ اۋقىمى ەلدەقايدا كەڭ بولدى. ال تەك ساباقپەن عانا اينالىسقان قاتارلاستارىمنىڭ مٷمكٸندٸگٸ شەكتەۋلٸ ەدٸ», – دەدٸ ول.
ەلشٸنٸڭ سٶزٸنشە, ستۋدەنتتٸڭ ەڭ قۇندى رەسۋرسى – ۋاقىت. سوندىقتان وقۋ جىلدارىن تەك دەرٸس پەن ەمتيحانعا ارناماي, جان-جاقتى دامۋعا پايدالانۋ ماڭىزدى.
«وقۋدى بٸتٸرگەننەن كەيٸن بوس ۋاقىت قازٸرگٸدەي كٶپ بولمايدى. سوندىقتان ستۋدەنتتٸك كەزەڭدەگٸ مٷمكٸندٸكتەردٸ تيٸمدٸ پايدالانعان جٶن», – دەدٸ دەۋرەن اباەۆ.
ەسكە سالايىق, قازٸرگٸ ۋاقىتتا دەۋرەن اباەۆ قازاقستاننىڭ رەسەيدەگٸ ەلشٸسٸ قىزمەتٸن اتقارىپ جٷر. ول بۇل قىزمەتكە 2023 جىلدىڭ 3 شٸلدەسٸندە تاعايىندالعان ەدٸ.
