Almaty qalasynyń turǵyny Gúljan Noǵaibaeva Prezident Qasym-Jomart Toqaevqa ashyq úndeý jasap, kúieýiniń zańsyz qamaýda otyrǵanyn málimdedi. Onyń aitýynsha, jubaiy – Aibek Noǵaibaev oligarh Alidar Ótemuratovtyń kompaniiasyna tiesili turǵyn úi qurylysynda merdiger retinde jumys istegen, dep habarlaidy Dalanews.kz.
Shaǵymdanýshynyń úndeýi "Pisma Prezidentý" telegram arnasyna jariialandy.
Video avtorynyń sózine súiensek, Noǵaibaev tarapynan barlyq jumys tiisti kelisimshartqa sáikes oryndalǵanymen, birneshe jyldan keiin kásipker "aqsha jymqyrdy" degen aiyppen tergeýge tartylyp, qazirgi ýaqytta alty aidan beri SI-18 tergeý izoliatorynda qamaýda otyr.
"Kúieýim eshqashan ol kompaniiada qyzmetker nemese materialdyq jaýapty tulǵa bolǵan emes. Qylmystyq istegi materialdardyń ózinde qarajattyń negizsiz alynǵanyn dáleldeitin birde-bir saraptama nemese aýdit qorytyndysy joq", — deidi Gúljan Noǵaibaeva.
Onyń aitýynsha, qurylys jumystary zańdy kelisimshartpen bekitilgen, tiisti tólemder shot-faktýra jáne oryndalǵan jumys aktileri arqyly qujat júzinde rastalǵan. Biraq tapsyrys berýshi tarap – Ótemuratovtyń kompaniiasy birneshe jyldan keiin kórsetilgen qyzmet qunyna kelispei, tólem jasaýdan bas tartqan.
"Azamattyq-quqyqtyq sipattaǵy daý qylmystyq iske ainalyp otyr. Bir ret bul is toqtatylyp, qylmys quramy joq dep tanylǵan. Soǵan qaramastan, tergeý organdary men prokýratýra bul isti qaita qozǵap, Medeý aýdandyq sotyna jetkizdi", — deidi shaǵymdanýshy.
Ol Prezidentten ádilettilik surap, jalǵyz baspanasy da ipotekada ekenin alǵa tartty.
"Eger urlyq jasasaq, jalǵyz úiimiz nege bankke kepilde tur? Bailyq pen bilikke ie bir otbasynyń sózi shyndyqtyń ornyn almastyrmaýy tiis", — deidi úsh balanyń anasy.
