Olardyń isinde Bergeıdiń de esimi atalady: Londonda Reseı tyńshylaryna úkim shyqty

Saǵynysh Sardarova 13 mam. 2025 10:15 800

Londonda Reseıdiń paıdasyna tyńshylyq jasaǵandarǵa úkim shyqty. Olar 5 jyldan 10 jylǵa deıin bas bostandyǵynan aıyryldy. Bul týraly BBC jazdy. Buǵan deıin olardyń isinde Bergeı Rysqalıevtiń esimi de atalǵan bolatyn. Dalanews.kz mán-jaıǵa sholý jasap shyqty.

Bolgarıa azamattarynan quralǵan, "Rýsev toby" dep atalatyn toptyń alty múshesiniń barlyǵy buǵan deıin Reseıdiń paıdasyna tyńshylyq jasaǵany úshin kináli dep tanylǵan edi, endi olarǵa naqty merzimge bas bostandyǵynan aıyrý jazasy taǵaıyndaldy.

Top jetekshisi Orlın Rýsevke eń qatań úkim shyǵaryldy: ol temir tordyń artynda 10 jyl 8 aıyn ótkizedi.

Qalǵan aıyptalýshylar da bas bostandyǵynan aıyryldy:

Bızer Djambazov - 10 jyl 2 aı;
Katrın Ivanova - 9 jyl 8 aı;
Vaná Gaberova - 6 jyl, 8 aı, 3 apta;
Tıhomır Ivanchev - 8 jyl;
Ivan Stoıanov - 5 jyl 3 apta.

Olardyń Bergeı Rysqalıevke ne qatysy bar?

Ulybrıtanıa bıligi Reseıdiń barlaý agenttikteriniń tapsyrysy boıynsha tyńshylyq jasady dep kúdiktengen bolgarıalyqtarǵa qatysty sot Londonnyń ortalyq qylmystyq sotynda ótken edi. Buǵan deıin olardyń Bergeı Rysqalıevke qandaı qatysy bary da aıtyldy.

BBC málimetinshe, prokýrorlar bul adamdar Germanıadaǵy amerıkalyq áskerı bazany qadaǵalap, Reseı bıliginiń qarsylastaryn, sonyń ishinde jýrnalıserdi baqylaýǵa tyrysty dep sanaıdy.

"Sotqa 33 jastaǵy Katrın Ivanova, 30 jastaǵy Vaná Gaberova jáne 39 jastaǵy Tıhomır Ivanchev keldi. Olar aıyptaýdy joqqa shyǵarady. Kúdiktilerdiń ekeýi - 46 jastaǵy Orlın Rýsev pen 43 jastaǵy Bızer Jambazov tyńshylyq jasaǵanyn moıyndady", - dep jazylǵan buǵan deıingi basylym málimetinde.

Basylym deregine súıensek, bul top Reseıdiń arnaıy qyzmetteriniń tapsyrysy boıynsha 2020 jyly tamyzdan 2023 jylǵy aqpanǵa deıin operasıalar oryndaǵan.

"Tergeý málimetteri boıynsha bul jelini Avstrıa azamaty jáne Wirecard kompanıasynyń burynǵy operasıalyq dırektory Ian Marsalek esimdi adam basqarǵan, ol Germanıada alaıaqtyqqa qatysty aıyppen izdestirildi. 2020 jyly Marsalek Eýropadan Mınskige qonǵan jeke ushaqpen qashyp ketti. Reseılik barlaý oǵan qashýǵa kómektesti dep sanalady", - dep jazylǵan buǵan deıingi derekte.

BBC dereginshe, olardyń Ulybrıtanıaǵa qashyp kelip, saıası baspana alǵan qazaqstandyq saıasatker Bergeı Rysqalıevke de áseri bolǵan.

"Aıyptaý málimetteri boıynsha kúdiktiler Reseıdiń Qazaqstanmen baılanysyn nyǵaıtý úshin Rysqalıevti de ańdyǵan.

Tergeý málimetteri boıynsha kúdiktilerdiń taǵy bir operasıasy Londonda ornalasqan Qazaqstan elshiligine baǵyttalǵan. …Prokýrorlardyń pikirinshe, bul da Reseı men Qazaqstan arasyndaǵy qarym-qatynasty nyǵaıtýǵa baǵyttalǵan", - dep jazylǵan buǵan deıingi derekte.

Dalanews.kz anyqtamasy

Bergeı Rysqalıev 2005 jyldan bastap Atyraý oblysy ákiminiń orynbasary, 2006 jyldan bastap Atyraý qalasynyń ákimi, 2006 jyldan 2012 jylǵa deıin Atyraý oblysynyń ákimi qyzmetin atqardy.

Bergeı Rysqalıev 2012 jyly Májilis depýtaty bolǵan aǵasy Amanjan Rysqalımen birge elden qashyp ketken bolatyn. Sol kezde olarǵa halyqaralyq izdeý jarıalanǵan edi.

Málimetterge súıensek, Rysqalıev memleketke ondaǵan mıllıard teńge shyǵyn keltirgen.