ۇلىبريتانيا بيلىگى رەسەيدىڭ بارلاۋ اگەنتتىكتەرىنىڭ تاپسىرىسى بويىنشا تىڭشىلىق جاسادى دەپ كۇدىكتەنگەن بولگاريالىقتارعا قاتىستى سوت لوندوننىڭ ورتالىق قىلمىستىق سوتىندا وتكەن ەدى. بۇعان دەيىن ولاردىڭ بەرگەي رىسقالييەۆكە قانداي قاتىسى بارى دا ايتىلدى.
BBC مالىمەتىنشە، پروكۋرورلار بۇل ادامدار گەرمانياداعى امەريكالىق اسكەري بازانى قاداعالاپ، رەسەي بيلىگىنىڭ قارسىلاستارىن، سونىڭ ىشىندە جۋرناليستەردى باقىلاۋعا تىرىستى دەپ سانايدى.
"سوتقا 33 جاستاعى كاترين يۆانوۆا، 30 جاستاعى ۆانيا گابەروۆا جانە 39 جاستاعى تيحومير يۆانچيەۆ كەلدى. ولار ايىپتاۋدى جوققا شىعارادى. كۇدىكتىلەردىڭ ەكەۋى - 46 جاستاعى ورلين رۋسيەۆ پەن 43 جاستاعى بيزەر جامبازوۆ تىڭشىلىق جاساعانىن مويىندادى"، - دەپ جازىلعان بۇعان دەيىنگى باسىلىم مالىمەتىندە.
باسىلىم دەرەگىنە سۇيەنسەك، بۇل توپ رەسەيدىڭ ارنايى قىزمەتتەرىنىڭ تاپسىرىسى بويىنشا 2020 جىلى تامىزدان 2023 جىلعى اقپانعا دەيىن وپەراسيالار ورىنداعان.
"تەرگەۋ مالىمەتتەرى بويىنشا بۇل جەلىنى اۆستريا ازاماتى جانە Wirecard كومپانياسىنىڭ بۇرىنعى وپەراسيالىق ديرەكتورى يان مارسالەك ەسىمدى ادام باسقارعان، ول گەرمانيادا الاياقتىققا قاتىستى ايىپپەن ىزدەستىرىلدى. 2020 جىلى مارسالەك ەۋروپادان مينسكىگە قونعان جەكە ۇشاقپەن قاشىپ كەتتى. رەسەيلىك بارلاۋ وعان قاشۋعا كومەكتەستى دەپ سانالادى"، - دەپ جازىلعان بۇعان دەيىنگى دەرەكتە.
BBC دەرەگىنشە، ولاردىڭ ۇلىبريتانياعا قاشىپ كەلىپ، ساياسي باسپانا العان قازاقستاندىق ساياساتكەر بەرگەي رىسقالييەۆكە دە اسەرى بولعان.
"ايىپتاۋ مالىمەتتەرى بويىنشا كۇدىكتىلەر رەسەيدىڭ قازاقستانمەن بايلانىسىن نىعايتۋ ءۇشىن رىسقالييەۆتى دە اڭدىعان.
تەرگەۋ مالىمەتتەرى بويىنشا كۇدىكتىلەردىڭ تاعى ءبىر وپەراسياسى لوندوندا ورنالاسقان قازاقستان ەلشىلىگىنە باعىتتالعان. …پروكۋرورلاردىڭ پىكىرىنشە، بۇل دا رەسەي مەن قازاقستان اراسىنداعى قارىم-قاتىناستى نىعايتۋعا باعىتتالعان"، - دەپ جازىلعان بۇعان دەيىنگى دەرەكتە.
Dalanews.kz انىقتاماسى
بەرگەي رىسقالييەۆ 2005 جىلدان باستاپ اتىراۋ وبلىسى اكىمىنىڭ ورىنباسارى، 2006 جىلدان باستاپ اتىراۋ قالاسىنىڭ اكىمى، 2006 جىلدان 2012 جىلعا دەيىن اتىراۋ وبلىسىنىڭ اكىمى قىزمەتىن اتقاردى.
بەرگەي رىسقالييەۆ 2012 جىلى ءماجىلىس دەپۋتاتى بولعان اعاسى امانجان رىسقاليمەن بىرگە ەلدەن قاشىپ كەتكەن بولاتىن. سول كەزدە ولارعا حالىقارالىق ىزدەۋ جاريالانعان ەدى.
مالىمەتتەرگە سۇيەنسەك، رىسقالييەۆ مەملەكەتكە ونداعان ميلليارد تەڭگە شىعىن كەلتىرگەن.
