Senat depýtaty Nurtóre Júsip AES qurylysyna qatysty referendým týraly pikir bildirdi, dep habarlaıdy Dalanews.kz.
Onyń aıtýynsha, búgin Qazaqstan halqy eldiń bolashaǵyna áser etetin mańyzdy tańdaý jasady.
“Búgin – búkilhalyqtyq referendým! El erteńine qatysty asa mańyzdy sheshim qabyldanatyn kún. Oblystardyń, respýblıkalyq mańyzy bar qalalardyń jáne elordanyń komısıalary usynǵan derekterge sáıkes, 2024 jylǵy 6 qazanda saǵat 14.00-degi jaǵdaı boıynsha, tizimge engizilgen azamattardyń jalpy sanynyń 51,77%-i búleten alǵan”, – dedi ol.
Onyń sózinshe, Qazaqstan Respýblıkasynyń “Respýblıkalyq referendým týraly” Konstıtýsıalyq zańynyń 31-baby 2-tarmaǵyna sáıkes, eger referendýmǵa qatysý quqyǵy bar azamattardyń jartysynan kóbi daýys berse, referendým ótken bolyp sanalady.
“Bul kórsetkishten ne uǵýǵa bolady? Demek, halyqtyń basym bóligi referendýmǵa belsendi qatysyp otyr. Respýblıka azamattary ýchaskelerge baryp, ózderiniń konstıtýsıalyq quqyǵyn júzege asyrýda. Elimizde sońǵy jyldary júrgizilgen saıası reformalardyń úlken nátıjesi osyndaı mańyzdy sheshimder qabyldaý kezinde aıqyn kórinip tur”, – dep qosty Nurtóre Júsip.
Eske sala keteıik, daýys berý tizimine 12,3 mıllıonǵa jýyq qazaqstandyq engizilgen.
Referendýmǵa 30 shet memleket pen tórt halyqaralyq uıymnyń (Táýelsiz Memleketter Dostastyǵy, Shanhaı yntymaqtastyq uıymy, Túrki memleketteri uıymy, Azıadaǵy ózara is-qımyl jáne senim sharalary jónindegi keńes) atynan 177 baıqaýshy qatysady.
Daýys berý barysyn 14 memlekettiń ortalyq saılaý organdarynyń ókilderi, sonyń ishinde Ázirbaıjan, Belarýs, Tájikstan jáne Ózbekstan ortalyq saılaý organdarynyń tóraǵalary da baqylap otyr.
Qazaqstan Respýblıkasynyń Syrtqy ister mınıstrligi 37 elden 200 sheteldik jýrnalıserdi akkredıttedi, olar da respýblıkalyq referendýmdy baqylap, aqparat taratady.
Elimizde barlyǵy 10 323 saılaý ýchaskesi jumys isteıdi, sonymen qatar, 59 elde sheteldik mekemelerde ashylǵan 74 saılaý ýchaskesi bar. Referendým nátıjeleri daýys berý kúninen bastap jeti kúnnen keshiktirilmeı buqaralyq aqparat quraldarynda jarıalanady.
