سەنات دەپۋتاتى نۇرتورە ءجۇسىپ اەس قۇرىلىسىنا قاتىستى رەفەرەندۋم تۋرالى پىكىر ءبىلدىردى، دەپ حابارلايدى Dalanews.kz.
ونىڭ ايتۋىنشا، بۇگىن قازاقستان حالقى ەلدىڭ بولاشاعىنا اسەر ەتەتىن ماڭىزدى تاڭداۋ جاسادى.
“بۇگىن – بۇكىلحالىقتىق رەفەرەندۋم! ەل ەرتەڭىنە قاتىستى اسا ماڭىزدى شەشىم قابىلداناتىن كۇن. وبلىستاردىڭ، رەسپۋبليكالىق ماڭىزى بار قالالاردىڭ جانە ەلوردانىڭ كوميسسيالارى ۇسىنعان دەرەكتەرگە سايكەس، 2024 جىلعى 6 قازاندا ساعات 14.00-دەگى جاعداي بويىنشا، تىزىمگە ەنگىزىلگەن ازاماتتاردىڭ جالپى سانىنىڭ 51،77%ء-ى بيۋللەتەن العان”، – دەدى ول.
ونىڭ سوزىنشە، قازاقستان رەسپۋبليكاسىنىڭ “رەسپۋبليكالىق رەفەرەندۋم تۋرالى” كونستيتۋسيالىق زاڭىنىڭ 31-بابى 2-تارماعىنا سايكەس، ەگەر رەفەرەندۋمعا قاتىسۋ قۇقىعى بار ازاماتتاردىڭ جارتىسىنان كوبى داۋىس بەرسە، رەفەرەندۋم وتكەن بولىپ سانالادى.
“بۇل كورسەتكىشتەن نە ۇعۋعا بولادى؟ دەمەك، حالىقتىڭ باسىم بولىگى رەفەرەندۋمعا بەلسەندى قاتىسىپ وتىر. رەسپۋبليكا ازاماتتارى ۋچاسكەلەرگە بارىپ، وزدەرىنىڭ كونستيتۋسيالىق قۇقىعىن جۇزەگە اسىرۋدا. ەلىمىزدە سوڭعى جىلدارى جۇرگىزىلگەن ساياسي رەفورمالاردىڭ ۇلكەن ناتيجەسى وسىنداي ماڭىزدى شەشىمدەر قابىلداۋ كەزىندە ايقىن كورىنىپ تۇر”، – دەپ قوستى نۇرتورە ءجۇسىپ.
ەسكە سالا كەتەيىك، داۋىس بەرۋ تىزىمىنە 12،3 ميلليونعا جۋىق قازاقستاندىق ەنگىزىلگەن.
رەفەرەندۋمعا 30 شەت مەملەكەت پەن ءتورت حالىقارالىق ۇيىمنىڭ (تاۋەلسىز مەملەكەتتەر دوستاستىعى، شانحاي ىنتىماقتاستىق ۇيىمى، تۇركى مەملەكەتتەرى ۇيىمى، ازياداعى ءوزارا ءىس-قيمىل جانە سەنىم شارالارى جونىندەگى كەڭەس) اتىنان 177 بايقاۋشى قاتىسادى.
داۋىس بەرۋ بارىسىن 14 مەملەكەتتىڭ ورتالىق سايلاۋ ورگاندارىنىڭ وكىلدەرى، سونىڭ ىشىندە ءازىربايجان، بەلارۋس، تاجىكستان جانە وزبەكستان ورتالىق سايلاۋ ورگاندارىنىڭ ءتوراعالارى دا باقىلاپ وتىر.
قازاقستان رەسپۋبليكاسىنىڭ سىرتقى ىستەر مينيسترلىگى 37 ەلدەن 200 شەتەلدىك جۋرناليستەردى اككرەديتتەدى، ولار دا رەسپۋبليكالىق رەفەرەندۋمدى باقىلاپ، اقپارات تاراتادى.
ەلىمىزدە بارلىعى 10 323 سايلاۋ ۋچاسكەسى جۇمىس ىستەيدى، سونىمەن قاتار، 59 ەلدە شەتەلدىك مەكەمەلەردە اشىلعان 74 سايلاۋ ۋچاسكەسى بار. رەفەرەندۋم ناتيجەلەرى داۋىس بەرۋ كۇنىنەن باستاپ جەتى كۇننەن كەشىكتىرىلمەي بۇقارالىق اقپارات قۇرالدارىندا جاريالانادى.
