Nuráli Álıev "Transtelekomdaǵy" úlesin satýdan buryn qomaqty dıvıdend alyp úlgergen. Qańtar aıynyń sońynda aksıonerler 2023 jylǵy taza paıdanyń 6 mlrd teńgesin dıvıdendke baǵyttaýdy maquldaǵan. Bul somanyń 4,5 mlrd teńgesi 31 qańtarda tólengen, dep jazady Dalanews.kz.

Ol tusta Álıev pen onyń seriktesi Dmıtrıı Pokýpatelevke tıesili Unit Telecom kompanıasy "Transtelekomnyń" 75 paıyzyn ıelenip otyrǵan edi.

Eger osy 75 paıyz shamamen teń bóliske tústi dep topshylasaq, onda 4,5 mlrd teńgeniń jartysy (2,25 mlrd teńge) Álıevtiń esep-shotyna aýdarylǵan.

Kúni keshe ǵana Nazarbaevtyń jıeni "Transtelekomdaǵy" úlesin tolyq satqanyn málimdegen. Álıevtiń ketýimen kompanıanyń dırektorlar keńesi jańaryp, quramǵa Jusan Mobile ókilderi endi. Uıymnyń túpki benefısıary – kásipker Ǵalymjan Esenov.

Álıevtiń qazirgi turǵylyqty mekeni Arab Ámirlikteri dep tuspaldaımyz. Astana ákiminiń orynbasary bolǵan tusta (2014-2016 j) Nuráli sheteldik ınvestısıaǵa jaýap bergen. Sol jyldary Ábý-Dabı sheıhi Ál-Naqaıanmen jıi júzdesken Álıev óziniń Capital Holding kompanıasy arqyly Emırattaǵy jyljymaıtyn múlikke ınvestısıany úıip-tókti deýge negiz bar.