Otyrys barysynda Aýyl sharýashylyǵy mınıstri Saparhan Omarov atap ótkendeı, jaıylym tapshylyǵy máselesi áli kúnge deıin sheshilmeı keledi. Zań júzinde másele rettelgen – ákimdikter jaıylymdardy basqarý jónindegi josparlardy 2 jyl merzimge ázirleýi tıis. Biraq búgingi kúni 2020-2021 jyldarǵa arnalǵan josparlar 190 aýdannyń 98-inde ǵana bekitildi.
«Máselen, Aqmola jáne Almaty oblystarynda bir de bir jospar bekitilmegen. Jerdi paıdalaný tıimdiliginiń monıtorıńine keletin bolsaq, paıdalanylmaǵan aýyl sharýashylyǵy alqaptaryn alyp qoıýǵa tejeýshi faktor bolyp turǵan, 2023 jyldyń sońyna deıin shaǵyn kásipkerlik sýbektilerine tekserý júrgizýge moratorııdiń belgilenýi. Paıdalanylmaıtyn jerlerdiń 90%-ǵa jýyǵy shaǵyn kásipkerlik sýbektilerine tıesili», - dedi Saparhan Omarov.
Keńes músheleri 2021-2025 jyldarǵa arnalǵan Agroónerkásiptik keshendi damytý jónindegi ulttyq jobany óz aldyna bólek talqylady. Joba sheńberinde 2024 jylǵa qaraı qus eti, shujyq ónimderi, irimshik pen súzbe, alma men balyq boıynsha qamtamasyz etilý – 100%-dy, al qant boıynsha 80%-dy quraýy tıis. Mınıstrliktiń aqparaty boıynsha 156 ınvestısıalyq joba 1,1 mlrd. dollar kóleminde agrarlyq ónimniń qosymsha eksportyn qamtamasyz etýge múmkindik beredi.
Otyrys qorytyndysy boıynsha Agrarlyq keńes ulttyq jobany partıanyń saılaýaldy baǵdarlamasynyń ındıkatorlaryna sáıkes pysyqtaýdy usyndy. Budan basqa, múddeli organdar bir aı merzimde bos ýchaskeler bolǵan jaǵdaıda eldi mekenderdiń aınalasynda 15 km deıingi radıýstaǵy bosalqy jerlerden qosymsha jaıylymdar bólý máselesin qaraýy qajet. Sondaı-aq ákimdikterge jeke sharýashylyqtarǵa paıdalanylmaı jatqan jaıylymdardy óz erkimen qaıtarý boıynsha túsindirý jumystaryn júrgizý usynyldy.
