Qýandyq Bishimbaevtyń burynǵy jubaiy Nazym Qaharman ony ata-ana quqyǵynan aiyrýdy talap etip, Joǵarǵy sotqa júgindi, dep habarlaidy Dalanews.kz.
Atalǵan aryz boiynsha Joǵarǵy sot ázirge sheshim shyǵarǵan joq.
Sonymen qatar sáýir aiynda Bishimbaev aliment tóleýden bas tartqysy kelgeni belgili boldy. Ol tabys kózi joq ekenin alǵa tartyp, aliment týraly buryn jasalǵan kelisimdi buzýǵa nietti.
"Bishimbaevtar tarapynan aliment tólemin azaitý maqsatynda kelisimdi qaita qaraý týraly ótinish tústi. Aqsha joq degen ýáj aitty. Qazir is qaralyp jatyr. Árine, biz munymen kelispeimiz", – dedi Nazym Qaharman.
Eske salaiyq, buǵan deiin Qýandyq Bishimbaevtyń burynǵy áieli Nazym Qaharman Bishimbaevtyń otbasy balalarǵa aliment tóleýden bas tartqanyn jetkizgen edi. Aqparatty Tengrinews.kz jazdy.
Onyń sózinshe, aliment únemi keshiktirilip tólengen, al aliment týraly kelisimde qarastyrylǵan keibir shyǵyn múldem ótelmegen.
"Byltyr demalys úshin eshqandai aqsha tólenbedi. Psihologtyń qyzmetteri úshin de aqy tólenbedi, biraq biz oǵan birneshe ret júgindik. Men tólegen barlyq somany Ǵazymjanov myrzaǵa jiberdim (Qýandyq Bishimbaevtyń advokaty - esk.), biraq olar muny elemedi. Densaýlyq týraly aitpai-aq qoiaiyn, dárigerge kóringenimiz, dárýmender, dári-dármekter tólenbedi", - dedi ol.
Ol 2020 jyly ajyrasý kezinde aliment týraly kelisim jasalǵanyn jetkizdi. Onyń aitýynsha, Qýandyq Bishimbaev aldymen qarjylyq jaýapkershilikti óz moinyna alýǵa daiyn ekenine sendirgen, biraq keiin bul týraly onyń advokatyna únemi eske salyp otyrýǵa týra kelipti.
"Naýryzda aliment tólenbedi. Azdy-kópti júieli túrde tólemder byltyr qarasha-jeltoqsanda ǵana túse bastady", - dedi Nazym Qaharman.
Aita keteiik, Nazym Qaharman málimdeme jasaǵan video 28 naýryzda túsirilgen. Pikirlerden keiin Qýandyq Bishimbaev pen Nazym Qaharman arasyndaǵy aliment daýyna bailanysty burynǵy ministrdiń advokaty Erlan Ǵazymjanov resmi túsinikteme berdi.
Onyń aitýynsha, jaqynda mediada taraǵan “Bishimbaevtar otbasy aliment tóleýden tolyq bas tartty” degen aqparat shyndyqqa janaspaidy.
“Qýandyq Bishimbaev aliment tóleýden bas tartqan joq. Balany asyraý – ár ata-ananyń zań men ar aldyndaǵy mindeti. Ol tek qazirgi materialdyq jaǵdaiynyń ózgerýine bailanysty, aliment tóleý týraly kelisimdi zań aiasynda qaita qaraýdy nemese buzýdy surap otyr. Qazirgi tańda turaqty tabys kózi joq, al zań boiynsha eger adamnyń qarjylai jaǵdaiy aitarlyqtai ózgerse, aliment kólemin qaita qaraýǵa quqyǵy bar”, — dedi advokat.
Sonymen qatar Erlan Ǵazymjanov Qýandyq Bishimbaevtyń ata-anasy da birshama ýaqyt boiy óz erikterimen nemerelerin asyraýǵa kómektesip, burynǵy kelisimde kórsetilgen mólsherde aliment tólep kelgenin aitty. Alaida bul jaǵdai sońǵy ýaqytta ózgergen.
“Nazym Qaharman Bishimbaevtyń qart ata-anasyna birneshe ret aýyr sóz aityp, bala men ata-ájeniń arasyn úzip, nemerelerin otbasyǵa qarsy qoiýǵa tyrysty. Buǵan qosa, áleýmettik jelide “psihologiialyq trening” degen atpen olardyń bedeline nuqsan keltiretin áreketter jasady. Osyndai jaǵdailardan keiin Bishimbaevtyń ata-anasy nemerelerin asyraýǵa kómektesýdi toqtatqan joq, biraq kómek mólsherin ózderi oryndy dep sanaǵan kólemge deiin qysqartty. Bul ýaqytsha sheshim, aliment týraly kelisim zań aiasynda qaita qaralǵanǵa deiin ǵana kúshinde bolady”, — dep túsindirdi qorǵaýshy.
Advokattyń aitýynsha, taraptar arasyndaǵy aliment máselesi endi zań júzinde sheshiledi.
Aita keteiik, Nazym Qaharman Qýandyq Bishimbaevpen 14 jyl resmi nekede boldy. Erli-zaiypty 2020 jyly ajyrasqan edi. Olardyń úsh balasy bar.
