Jelide eks-prezıdent Nursultan Nazarbaevtyń kúıeýbalasy Tımýr Qulybaev Ulttyq Olımpıada komıteti tóraǵasy qyzmetinen ketedi degen aqparat tarady. Bul týraly "Chemodan gossekretov" telegram arnasynda jazylǵan, - dep habarlaıdy Dalanews.kz.

Telegram arna málimetinshe, bul Tokıo men Azıada Olımpıadasyndaǵy sátsizdikterge baılanysty.

"Qulybaev sporttan qol úzdi, sondaı-aq, uıymnyń qyzmetin qarjylandyrǵysy kelmedi dep aıyptalyp otyr. Ol tolyqtaı respýblıkalyq búdjetke súıenip alǵan... Qulybaevtyń sporttan ketýi kásipqoı sportshylardy daıyndaýǵa jáne buqaralyq sportqa degen kózqarastardy qaıta qaraýǵa áser etedi", - delingen jazbada.

Sonymen qatar, jazbada Keńes Raqyshev te boks federasıasynyń basshysy qyzmetinen ketetini aıtylǵan.

Buǵan deıin depýtat Ermurat Bapı Ulttyq Olımpıada komıtetine Tımýr Qulybaev basshylyq qyzmetke kelgennen bastap qazaq sporty quldyrap ketkenin aıtty.

"Onyń oıy eldiń munaıyn satyp, qaltasyn toltyrý. Sportty qaıtsyn?! ...Parıj Olımpıadasy qarsańynda mundaı jaǵdaıǵa múldem jol berilmeýi tıis! Ulttyq Olımpıada Komıtetine túbegeıli ózgerister kerek", - degen edi Bapı.

Depýtat Erlan Saırov ta sport prosesine baı sheneýnikterdi qatystyrmaı, túgel alyp tastaýdy usyndy. 

“Mınıstrlikke Qazaqstannyń sporttyq prosesine olıgarhtardy qatystyrmaı, túgel alyp tastaýdy usynamyn. Qazir Tımýr Qulybaev pen onyń qaramaǵyndaǵylar otandyq sportqa kedergi keltirip jatyr. Bul máseleni qalaı sheshemiz? Quzyretti mınıstrliktiń olıgarhtardy sporttan qýýǵa quqyǵy bar ma? Sońǵy tórt jylda kórshi Ózbekstanǵa jete almaı kelemiz. Áıtpese Qazaqstan sportqa 1 mlrd dollar bóledi. Kórshimiz mundaı qarjyny bólgen emes. Sonda mıllıardtyń bári urlanyp jatyr degen sóz ǵoı” – dedi Saırov.