Bilikke jaqyn blogerler: "Bul Tuńǵysh prezidenttiń eskertkishi. Perýashev Nazarbaevqa tosyn syilyq jasamaq. Túr-tulǵasy Elbasynyń jas kezine uqsaidy" dep joryp úlgerdi.
Bilikshil bloger Samat Nurtaza 6 shildede Túrkistan qalasynda Nazarbaevqa arnalǵan alyp eskertkishtiń boi kóteretin alǵashqy bolyp habarlady.
"Bul Májilistegi oppozitsiialyq "Aq Jol" partiiasynyń Nursultan Nazarbaevqa degen tartýy. Oppozitsiianyń ózi moiyndaǵan Elbasyny, qalai moiyndamaisyń?", – dep jazdy ol.
Álemjelidegi gý-gý áńgime Perýashevqa jetip "Aqjol" basshysy bul fotonyń qaida jáne qashan túsirilgenin aityp bergen eken.
"Ótken qysta ózim qurmetteitin, ataqty músinshi Tileýberdi Binashev aqsaqalymyz sheberhanasyna shaqyryp, dastarhan jaiyp, basqa da týyndylarymen birge bozbala kezindegi dosy Shámshi Qaldaiaqovtyń músinin kórsetken edi. Sol kezde músinshi aǵamyz jasaǵan birneshe jumysynyń qasynda turyp, sýretke túsýimdi ótingen bolatyn. Qalǵanynyń barlyǵy – áldekimniń sandyraǵy ", - dep jazdy Perýashev.
Áitkenmen Nazarbaev eskertkish ornatylady degen áńgime tegin emes. Bul týraly aqparatty Sputnik-ke pikir bildirgen Iasaýi atyndaǵy halyqaralyq qazaq-túrik ýniversitetiniń aqparat ortalyǵy rastady.
"Keshe halyqaralyq onlain konferentsiia boldy. Jiyn TÚRKSOI, TÚRKPA, Túrki akademiiasynyń birlesýimen ótti. Ony oblys ákimdigi men ýniversitet uiymdastyrdy. Ol jerde TÚRKSOI uiymynyń bas hatshysynyń orynbasary Bilal Chakydjy Nazarbaevtyń eńbegin erekshe atap ótip, osy oblysta Nazarbaevqa arnap eskertkish qoiýdy usyndy", - dedi aqparat ortalyǵyǵynyń redaktory Aqerke Isabekova.
Aitýynsha, jiynǵa qatysqandar bul usynysty biraýyzdan qoldaǵan. Alaida onyń qashan iske asatyny, eskertkishtiń pishini qandai bolary ázirge anyq emes.
Astana kúnimen tuspa-tus keletin Nazarbaevtyń týǵan sońy 15 jyl boiyna tolassyz toilanyp keledi.
Al prezident Toqaevtyń otbasynda týǵan kúndi atap ótetin dástúr joq. Memleket basshynyń baspasóz hatshysy Berik Ýáli buǵan bylai dep túsinikteme bergen:
"17 mamyr ádettegidei jumys kúni. Prezident Qasym-Jomart Toqaev bekitilgen kestege sáikes jumys isteidi. Sondyqtan eshqandai is-shara uiymdastyrylmaidy, tipti, Ákimshilik qyzmetkerlerine de Prezidentti quttyqtaýǵa ruqsat etilmedi. Memleket basshysy úshin búgin qalypty jumys kúni. Onyń áýletinde balalardyń da, úlkenderdiń de týǵan kúnin toilaý dástúri qalyptaspaǵan".
