بيلىككە جاقىن بلوگەرلەر: "بۇل تۇڭعىش پرەزيدەنتتىڭ ەسكەرتكىشى. پەرۋاشيەۆ نازاربايەۆقا توسىن سىيلىق جاساماق. ءتۇر-تۇلعاسى ەلباسىنىڭ جاس كەزىنە ۇقسايدى" دەپ جورىپ ۇلگەردى.
بيلىكشىل بلوگەر سامات نۇرتازا 6 شىلدەدە تۇركىستان قالاسىندا نازاربايەۆقا ارنالعان الىپ ەسكەرتكىشتىڭ بوي كوتەرەتىن العاشقى بولىپ حابارلادى.
"بۇل ماجىلىستەگى وپپوزيسيالىق "اق جول" پارتياسىنىڭ نۇرسۇلتان نازاربايەۆقا دەگەن تارتۋى. وپپوزيسيانىڭ ءوزى مويىنداعان ەلباسىنى، قالاي مويىندامايسىڭ؟"، – دەپ جازدى ول.
الەمجەلىدەگى گۋ-گۋ اڭگىمە پەرۋاشيەۆقا جەتىپ "اقجول" باسشىسى بۇل فوتونىڭ قايدا جانە قاشان تۇسىرىلگەنىن ايتىپ بەرگەن ەكەن.
"وتكەن قىستا ءوزىم قۇرمەتتەيتىن، اتاقتى ءمۇسىنشى تىلەۋبەردى بيناشيەۆ اقساقالىمىز شەبەرحاناسىنا شاقىرىپ، داستارحان جايىپ، باسقا دا تۋىندىلارىمەن بىرگە بوزبالا كەزىندەگى دوسى ءشامشى قالداياقوۆتىڭ ءمۇسىنىن كورسەتكەن ەدى. سول كەزدە ءمۇسىنشى اعامىز جاساعان بىرنەشە جۇمىسىنىڭ قاسىندا تۇرىپ، سۋرەتكە ءتۇسۋىمدى وتىنگەن بولاتىن. قالعانىنىڭ بارلىعى – الدەكىمنىڭ ساندىراعى "، - دەپ جازدى پەرۋاشيەۆ.
ايتكەنمەن نازاربايەۆ ەسكەرتكىش ورناتىلادى دەگەن اڭگىمە تەگىن ەمەس. بۇل تۋرالى اقپاراتتى Sputnik-كە پىكىر بىلدىرگەن ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ اقپارات ورتالىعى راستادى.
"كەشە حالىقارالىق ونلاين كونفەرەنسيا بولدى. جيىن تۇركسوي، تۇركپا، تۇركى اكادەمياسىنىڭ بىرلەسۋىمەن ءوتتى. ونى وبلىس اكىمدىگى مەن ۋنيۆەرسيتەت ۇيىمداستىردى. ول جەردە تۇركسوي ۇيىمىنىڭ باس حاتشىسىنىڭ ورىنباسارى بيلال چاكىدجى نازاربايەۆتىڭ ەڭبەگىن ەرەكشە اتاپ ءوتىپ، وسى وبلىستا نازاربايەۆقا ارناپ ەسكەرتكىش قويۋدى ۇسىندى"، - دەدى اقپارات ورتالىعىعىنىڭ رەداكتورى اقەركە يسابەكوۆا.
ايتۋىنشا، جيىنعا قاتىسقاندار بۇل ۇسىنىستى ءبىراۋىزدان قولداعان. الايدا ونىڭ قاشان ىسكە اساتىنى، ەسكەرتكىشتىڭ ءپىشىنى قانداي بولارى ازىرگە انىق ەمەس.
استانا كۇنىمەن تۇسپا-تۇس كەلەتىن نازاربايەۆتىڭ تۋعان سوڭى 15 جىل بويىنا تولاسسىز تويلانىپ كەلەدى.
ال پرەزيدەنت توقايەۆتىڭ وتباسىندا تۋعان كۇندى اتاپ وتەتىن ءداستۇر جوق. مەملەكەت باسشىنىڭ باسپا ءسوز حاتشىسى بەرىك ءۋالي بۇعان بىلاي دەپ تۇسىنىكتەمە بەرگەن:
"17 مامىر ادەتتەگىدەي جۇمىس كۇنى. پرەزيدەنت قاسىم-جومارت توقايەۆ بەكىتىلگەن كەستەگە سايكەس جۇمىس ىستەيدى. سوندىقتان ەشقانداي ءىس-شارا ۇيىمداستىرىلمايدى، ءتىپتى، اكىمشىلىك قىزمەتكەرلەرىنە دە پرەزيدەنتتى قۇتتىقتاۋعا رۇقسات ەتىلمەدى. مەملەكەت باسشىسى ءۇشىن بۇگىن قالىپتى جۇمىس كۇنى. ونىڭ اۋلەتىندە بالالاردىڭ دا، ۇلكەندەردىڭ دە تۋعان كۇنىن تويلاۋ ءداستۇرى قالىپتاسپاعان".
