Atap aitqanda, tótenshe jaǵdai bolǵan kezeńde barlyq issaparlar men josparly kópshilik is-sharalary toqtatylady. Zańdar boiynsha jumystar jalǵasa beredi. Bul rette depýtattarǵa palata men komitetterdiń otyrystaryna shaqyrylǵandardyń sanyn múmkindiginshe shekteý usynylyp otyr.
Apparattyń 70-ten astam qyzmetkeri úiden isteitin jumys tártibine kóshirildi, qalǵan qyzmetkerler úshin qysqartylǵan jumys kúni belgilendi. Senat ǵimaratynda kúnine birneshe márte qajetti sanitarlyq-epidemiologiialyq jumystar júrgizilýde.
"Memlekettiń mindeti - azamattarymyzdyń ómiri men densaýlyǵyn saqtaý, ekonomika men tutyný naryǵynyń jumys isteýin qamtamasyz etý. Juqpaly dertpen nátijeli kúresý úshin erik-jiger men sheshimdi bolý kerek. Degenmen saqtyq ta kerek. Bizge erteńgi kúnge senimmen qarap, boiymyzdaǵy úrei men kúdikten arylý qajet. Biz – talai synda shynyqqan myqty halyqpyz. Biz bárin jeńemiz", - dedi D.Nazarbaeva óz sózinde.
Senat basshysy azamattardyń jumyspen qamtylýy men tabystary máselesine bólek toqtaldy.
"Tótenshe jaǵdai men karantin, ókinishke orai, iskerlik belsendilikti baiaýlatýǵa alyp keledi. Kóptegen adamdar ýaqytsha jumyssyz ǵana emes, sondai-aq ómir súrýge arnalǵan qarajatsyz da qalýy múmkin.
Almaty qalasynda turaqty nemese ýaqytsha jumys isteitin Almaty oblysynyń turǵyndary jónindegi máseleler bar ekeni bizge belgili. Bul 500 myń shamasyndaǵy adam, olarǵa otbasy múshelerin qosyńyz, biz problemanyń aýqymyn tiisti mólsherde kóre alamyz.
Memlekettik organdar, depýtattar bul jaǵdaiǵa basa nazar aýdarýy tiis dep esepteimin. Qalyptan tys, batyl sheshimder qajet", - dedi D.Nazarbaeva.
Senat Tóraǵasynyń aitýynsha, "juqpaly dertpen nátijeli kúresý úshin erik-jiger men sheshimdi bolý kerek. Degenmen saqtyq ta kerek".
Senatorlar otyrys sońynda depýtattar men Senat apparatynyń bir kúndik eńbekaqysyn virýspen kúres qoryna aýdarý týraly sheshim qabyldady.
