Búgin el úshin asa mańyzdy sheshim qabyldamaqpyn. Osyǵan deiingi áleýmettik-ekonomikalyq ahýal turaqty boldy. Biraq bul búgingi kúni jetkiliksiz kórsetkish. Men uiytqy bolǵan Úshinshi modernizatsiia jáne "Ult jospary – 100 naqty qadam" baǵdarlamalary qurylymdyq reformany jedeldetý úshin qabyldanǵan.
5 institýttsionaldy reforma tolyq júzege asqanda eldegi shaǵyn jáne orta biznestiń belsendiligi artyp, ekonomikadaǵy memsektordyń úlesi tómender edi. Sottarǵa jáne quqyq qorǵaý organdaryna degen senim qalyptasar edi.
Úkimet ekonomikanyń tamyryna qan júgirtedi dep birsypyra zań qabyldady, biraq birde-biri maqsatyna jetken joq. Ishki jalpy ónim shikizattyq sektordyń esebinen ósip otyr.
Úkimet pen Ulttyq bank ekonomikanyń ósýine, damýyna sebepker bolatyn naqty jaǵdai almady. Memlekettik baǵdarlamalar oryndalyp jatqanymen, kóptegen baǵyttar boiynsha nátije joq. Jumys oryndary jetkiliksiz, bul ásirese aýyldarda anyq kózge uryp tur.
Shaǵyn jáne orta biznes ekonomikanyń kúretamyryna ainala almady. Ministrler men ákimder bizneske kóńil bólýdi qoidy.
Úkimetke, ákimderge halyqtyń turmysyn jaqsartý, tabysyn ósirý týraly talai márte tapsyrma berdim. Eki jyl buryn konstitýttsiialyq reforma jasap, Úkimet pen ákimderge áleýmettik-ekonomikalyq máselelerdi sheshýde erkindik berdim.
Indýstrialdy, áleýmettik, infraqurylymdyq, densaýlyq jáne bilim salasyna qatysty birtalai baǵdarlama qabyldandy. Qarjy bólindi. Biraq, birde-biri jolǵa qoiylǵan joq. Júzege aspady. Halyqtyń tabysy ósken joq. Turmysy jaqsarǵan joq.
Otbasyndaǵy tabystyń azyq-túlikke ketetin úlesi ósken ústine ósip keledi. Atqarýshy organdardyń júrdim-bardym qaraýynan qoǵamnyń kóp bóligi áleýmettik kómekten qaǵyldy.
Úkimet músheleri, ministrler, ákimder halyqpen jumys istemedi, halyqtyń sózimen sanaspady, máselesine qulaq túrmedi.
Osy jaǵdaida men halyq múddesin eskere otyryp kelesidei sheshim qabyldadym:
Úkimet otstavkaǵa ketýi tiis dep esepteimin. Jańa úkimet halyqtyń turmys-jaǵdaiyn jaqsartý úshin naqty sharalar qabyldaýy kerek. Ekonomikany tiriltý qajet.
"Nur Otannyń" aldaǵy jiynynda eldiń turmysyn jaqsartý, tabysyn kóterýge qatysy birqatar is-sharalar josparyn usynamyn. Buǵan biýdjetten jáne Ulttyq qordan qomaqty qarjy bólinedi.
Bul qarjy kelesidei mindetterdi oryndaýǵa:
- Jaǵdaiy tómen azamattardy áleýmettik qoldaýǵa;
- Olardy baspanamen qamtýǵa;
- Aimaqtardy damytýdyń baǵyt-baǵdaryn kúrdeli túrde ózgertýge
baǵyttalady.
Jańa úkimet óz jumysyn osyǵan negizdeýi kerek. Úkimettiń qolyndaǵy qarjy maqsatsyz jumsalyp jatyr. Budan keiin munyń barlyǵyna baqylaý júrgiziledi. Aldaǵy "Nur Otannyń" jiynynda bul týraly egjei-tegjeili aitamyn, – dedi Nazarbaev.
