Májilis depýtaty Erlan Saiyrov Qazaqstannyń strategiialyq resýrstary sheteldik oligarhtardyń emes, otandyq kásipkerlerdiń qolynda bolýy tiis degen pikir bildirdi, dep habarlaidy Dalanews.kz.
Saiyrovtyń aitýynsha, Mashkevich kezinde Elbasy Nursultan Nazarbaevtyń jeke oligarhy bolǵan. Ol Qazaqstan ekonomikasynyń strategiialyq baǵyttaryn uzaq jyldar boiy iemdenip, odan bailyq jinap, elimizge eshqandai paida ákelmegen.
“Jaqynda Nazarbaevtyń jeke oligarhy bolǵan Mashkevich dúnieden ótti. Toqsanynshy jyldardyń basynda Nazarbaev Qazaqstannyń strategiialyq resýrstaryn baqylap otyrý úshin shetten kelgen kelimsekterge babalarymyz salǵan zaýyt-fabrikalardy tegin úlestirip berdi. Sebebi sol kezeńde qazaqtar osyndai iri óndiristerge ie bolsa, erteń bilikke saiasi básekeles bolyp shyǵýy múmkin degen úrei bolǵan”, — deidi depýtat.
Saiyrovtyń paiymynsha, dál osyndai saiasattyń saldarynan eldiń bailyǵy sheteldikterdiń ýysynda ketken.
“Al Mashkevich bolsa, osy otyz jyldyń ishinde qazaqtyń jerinde emin-erkin júrdi, shalqyp ómir súrdi, ishti-jedi. Bizdiń jerimizdegi strategiialyq resýrstardy satyp, baiydy. Biraq tapqan bailyǵyn elge emes, túgeldei derlik shetelge shyǵaryp otyrdy. Qazaqstanǵa shynaiy paida ákeldi dep aitýǵa kelmeidi”, — dep ashyndy depýtat.
Ol Qazaqstan ekonomikasynyń negizgi tirekteri memlekettiń baqylaýynda bolyp, olardy otandyq kásipkerlerge berý kerek degen kózqaras bildirdi.
“Qazaqstannyń strategiialyq resýrstary — jer qoinaýy, metall, munai. Bizdiń memleketimizdiń ekonomikasynyń strategiialyq resýrstarynyń barlyǵyn ulttyq býrjýaziiaǵa, iaǵni ózimizdiń qarakózderimizge berýimiz kerek”, — deidi Erlan Saiyrov.
Depýtat bul tájiribede Aziia elderinen úlgi alýǵa shaqyrdy.
“Ońtústik Koreia, Malaiziia, Indoneziia, Japoniia sekildi memleketterde strategiialyq mańyzdy salalar tek sol eldiń azamattarynyń qolynda. Jergilikti halyq ielenip, memleketine qyzmet etip otyr. Dál osy tájiribeni bizge de qoldaný qajet”, — dep qosty ol.
Saiyrov sózin qorytyndylai kele, Qazaqstanǵa paida ákeletin jalǵyz kúsh jergilikti qazaq halqy ekenin basa aitty.
“Bizdiń Qazaqstanǵa qazaqtan basqa kómektesetin eshkim joq”, — dep túiindedi ol.
Aita keteiik, 22 naýryzda belgili kásipker jáne Eurasian Resources Group (ERG) negizin qalaýshylardyń biri Aleksandr Mashkevich 72 jasynda ómirden ótti.
ERG baspasóz qyzmetiniń habarlaýynsha, onyń qaitys bolýyna uzaqqa sozylǵan syrqat sebep bolǵan
“Ol 2014 jyldan 2024 jylǵa deiin ERG Direktorlar keńesiniń tóraǵasy boldy. Sondai-aq, Mashkevich uzaq jyldar boiy “Eýraziialyq bank” AQ Direktorlar keńesiniń tóraǵasy qyzmetin atqardy”, – dep habarlady kompaniialar tobynyń baspasóz qyzmeti áleýmettik jelilerde.
Aita keteiik, belgili kásipker ERG-ti Patoh Shodiev, Ibragimovtar otbasy jáne Qazaqstan úkimetimen birlese basqaryp, kompaniianyń damýyna eleýli úles qosty. ERG quramyna TNK “Qazhrom”, Sokolov-Sarybai taý-ken baiytý óndiristik birlestigi, “Aliýminii Qazaqstan”, Qazaqstan elektroliz zaýyty sekildi iri óndiristik kásiporyndar kiredi.
Sonymen qatar Mashkevich Shodiev jáne Ibragimovtarmen birge «Eýraziialyq qarjy kompaniiasy» AQ, «Eýraziialyq ónerkásip kompaniiasy» AQ jáne «Eýraziialyq óndiristik kompaniiasy» JShS-niń teń iesi boldy. Ol Qazaqstan Prezidenti janyndaǵy Sheteldik investorlar keńesiniń múshesi ári Qazaqstan at sporty federatsiiasynyń qurmetti prezidenti retinde de tanymal edi.
