Májilis depýtaty Aidos Sarym «Sadaq media» arnasyna bergen suhbatynda Altynbek Sársenbaevtyń ólimine qatysty derekter aitty, dep habarlaidy Dalanews.kz.
Onyń aitýynsha, Altynbektiń qazasyn Nursultan Nazarbaevpen bailanystyrýdyń qajeti joq.
«Kezinde Rysbek Sársenbaev aǵamyz emotsiiamen biraz dúnieni aityp jiberdi. Áli de aityp júr. Biraq oǵan dálel joq qoi. Ol jerde Nazarbaevtyń qulaǵy kórinýi múmkin. Biraq ádilet degen bolýy tiis qoi, jobalap, ymdap bolsa da dáleldei alǵan adam joq. Men óz basym Altynbektiń ólimin Rahat Álievke jaqyndatam. Altynbekpen jyldap aralasqan, áli kúnge deiin sol ortada júrgen biraz azamatpen aralasam. Biraq olardyń eshqaisysy da tikelei Nazarbaevtan kórip jatqan joq.
Bul Rysbektiń óziniń ustanymy, óziniń jeke pikiri. Kezinde Altynbektiń janynda júrgen, qaǵazyn jazyp berip júrgen Rysbek emes, men bolatynmyn. Men ony jaqsy bilemin», deidi Aidos Sarym.
Sondai-aq ol Altynbek Sársenbaiulynyń kezinde óte kekshil bolǵanyn aitady. Biraq ýaqyt óte kele ózgergen.
«Altynbek óte kekshil adam boldy. Kóp adamdy jek kórdi. Solardyń biri – Serik Ábdrahmanov edi. Ekinshi bir adam boldy. Ol - Baltash Tursynbaev bolatyn. Biraq ýaqyt óte kele ózgerdi, sanaly ǵumyrynda óziniń jek kóretin adamdarmen tatýlasyp, solardyń deńgeiine túsip, sóileskenin kórdim», - deidi depýtat.
