Nazarbaev: "Elimizde qos bilikke jol berilmeidi"
23 mamyr kúni Nur-Sultan qalasynda ótken jiynda Nazarbaev sailaý naýqanyn jiti qadaǵalap otyrǵanyn aityp, Qazaqstanda saiasi básekeniń bar ekenine toqtalǵan.
"Sailaýǵa 7 kandidat tústi. Bul – elimizde saiasi básekeniń bar ekenin aiǵaqtaidy. Kandidattar túrli qoǵamdyq toptar men birlestikterdiń múddesin bildiredi. Ár kandidat elimizdi jáne qoǵamdy damytýǵa arnalǵan óz baǵdarlamasyn usyndy", – dedi Nursultan Nazarbaev.
Sonymen qatar partiia basshysy barlyq kandidattarǵa sailaýaldy úgit-nasihat jáne turǵyndarmen jumys júrgizý úshin birdei múmkindikter berilgenin atap ótti.
Sondai-aq, Nursultan Nazarbaev infraqurylymdy damytý, óńirlerde turǵyn úi salý, halyqtyń az qamtylǵan toptaryn qoldaý, jańa jumys oryndaryn ashý jónindegi memlekettik baǵdarlamalardy júzege asyrý máselelerine de toqtaldy.
"Qazaqstanda jumyssyzdyq emes, kásiptiń tapshylyǵy bar. Sol sebepten, birinshi jumysshy mamandyqtaryna tegin oqytatyn baǵdarlama ázirlengen bolatyn. Biz jastar úshin barlyq jaǵdai men múmkindik jasadyq", – dedi Nursultan Nazarbaev.
Sondai-aq, Nursultan Nazarbaev aldaǵy ýaqytta el igiligi úshin qyzmet ete beretinin de aitty.
"Men elimizdiń igiligi úshin qyzmet ete beremin. Memleketimizde qos bilikke jol berilmeitinin atap ótkim keledi. Bárimiz halyq sailaǵan Prezidentke qoldaý kórsetip, jumys isteimiz", – dep túiindedi Nazarbaev.
