Jastardyń ómirlik maqsaty qymbat telefon men sándi kólik sekildi materialdyq qajettilikterdi óteýmen ǵana shektelmeýi kerek. Mundai pikirdi Nurtóre Júsip bildirdi, dep habarlaidy dalanews.kz.
Bárimiz urpaq ósirip otyrmyz. Balalarymyz, nemeremiz bar. Qazaq jasy, urpaǵymyz qandai bolýy kerek? Árine, óz urpaǵymyzdyń jaman bolǵanyn kórgimiz kelmeidi. Eń birinshi másele - nadan bolǵanyn kórgimiz kelmeidi. Nadandyq pen adamdyqtyń maidany - máńgilik maidan. Nadandyqtyń aýylynda qalǵan adam adamdyqtyń aýylyna jolai almaidy, deidi Nurtóre Júsip.
Ol qylmys ta, kórseqyzarlyq ta, kórealmaý da nadandyqtan shyǵatynyn aitady.
Sóz qýarlyq, qolynan is kelmei, synap, minep otyrýdyń bári nadandyq. Osynyń bárin Abai atamyz aityp ketken. Sondyqtan adamdyqtyń jolyn ustaný kerek. Adamdyq joly - ardyń joly. Ar, uiat, namysty aiaq-asty etpe. Ony saqta, qadirle, deidi Nurtóre Júsip.
Onyń sózinshe, adam balasy ómirge kelgen soń ultyna paidasy tietin azamat bolýy kerek.
Osy jastardyń qaperinde turýy kerek. Al tamaq iship, aiaq bosatyp, kiim kiip, qymbat zat alǵannan adamnyń maqsaty men muraty qajettiligin ótegendei bolar, biraq rýhani suranys, jan álemin baiytatyn dúniege jastar muqiiat bolsa eken dep tileimin, deidi Nurtóre Júsip.
