Mádeniet jáne sport ministrligi Astanadaǵy eki iri sport nysanyn — «Astana Arena» stadiony men «Alaý» muz saraiyn jóndeýge respýblikalyq rezervten 20,9 mlrd teńge bólý týraly ótinishpen Úkimetke júgindi, dep habarlaidy Dalanews.kz.
Qarajat 2026 jylǵa josparlanǵanymen, ár nysanǵa naqty qansha soma qajet ekeni kórsetilmegen.
Aita keteiik, «Astana Arenada» aýqymdy jóndeý jumystary 2023 jyldyń sońynan bastap 2025 jyldyń basyna deiin júrgizilgen bolatyn. Ol kezde 15 mlrd teńge bólinip, ÝEFA talaptaryna sai gazon, jylytý jáne sýarý júieleri aýystyrylyp, shatyr men qasbet elementteri jańartylǵan edi. Soǵan qaramastan, 2024 jyldyń jazynda stadion tek Kóshpendilerdiń dúniejúzilik oiyndary úshin ýaqytsha ashyldy. Al «Astana» men «Chelsi» fýtbol komandalary arasyndaǵy match Almatyǵa aýystyryldy.
«Alaý» muz saraiy da 2024 jyly jóndeýden ótken. Buǵan deiin, 2021 jyly nysannyń bir bóligin jóndeýge 12,3 mln teńge jumsalǵan bolatyn. Tehnikalyq qorytyndyǵa sáikes, ǵimarattyń shatyry kúrdeli jóndeýdi qajet etedi.
«Astana Arena», «Alaý» jáne «Barys Arena» sporttyq keshenderin basqarý quqyǵy Mtex Management kompaniiasyna berilgen. Al bul nysandar resmi túrde qalalyq aktivter jáne memlekettik satyp alýlar basqarmasynyń ieliginde. Mtex Management kompaniiasynyń teń ieleriniń biri — burynǵy KVN oiynshysy Sanat Shapashov.
