Qazaqstanda suiytylǵan gaz tapshy jáne bul másele jýyq arada sheshilmeidi. Sársenbi kúni jýrnalisterdiń suraqtaryna jaýap bergen energetika ministri Almasadam Sátqaliev osylai dep málimdedi.
"Naryqta gaz edáýir tapshy. Qazir avtojúrgizýshilerge: atalǵan otyn túri elde tapshy jáne bul másele jýyq arada sheshilmeidi dep ashyq aitýǵa májbúrmiz" dedi Sátqaliev. Onyń sózinen Vlast keltiredi.
Ministrdiń aitýynsha, keiingi 9 aida gazdy tutyný kólemi 25 paiyzǵa artqan, iaǵni qazir aiyna 225-250 myń tonna gaz tutynady. Eger bul tendentsiia jalǵasa berse jáne shara qoldanylmasa, gaz tapshylyǵy ýshyǵady.
Ol azamattarmen túsindirme jumystarynyń mańyzdylyǵyn atap ótip, energetika ministrliginiń avtogaz baǵasyn ósirý bastamasy úkimet deńgeiinde keńinen talqylanady dedi.
"Memlekettiń áleýmettik osal toptardy qoldaý normalaryn qoldanýǵa múmkindigi bar. Memlekette óndiristi sýbsidiialaý arqyly qoldaý quraly bar. Úkimet kez kelgen jaǵdaida teńgerimdi túrde áreket etedi" dedi ol.
Bir apta buryn, 1 qarashada energetika ministri Almasadam Sátqaliev suiytylǵan gaz baǵasynyń ósetinin habarlaǵan. Ministr "gaz baǵasy birden emes, satyly túrde 110 teńgege deiin ósedi" degen. Sátqalievtiń sózinshe, qazir otyn gazasy ishki naryqqa óz baǵasynan tómen — 50-80 teńge aralaǵynda satylyp jatyr.
Qazaqstanda bólshek saýdadaǵy suiytylǵan gazdyń shektik mólsherin memleket retteidi.
Energetika ministrligi qyrkúiek aiynda suiytylǵan munai gazynyń shektik baǵasyn anyqtaý erejesi bekitilgen ministrdiń qaýly jobasyn jariialaǵan. Oǵan sáikes, endi suiytylǵan gaz baǵasy jarty jyl saiyn ózgerip otyrady (buǵan deiin jylyna bir ret ózgertilgen).
2022 jyly qańtarda Jańaózende jurt suiytylǵan gaz baǵasynyń qymbattaýyna qarsy narazylyq bildirip, muny Qazaqstannyń basqa aimaǵy da qoldaǵan. Suiytylǵan gaz baǵasyna qarsylyq keiin basqa da áleýmettik talaptarǵa ulasqan. Artynsha narazylyq elde tártipsizdikke ulasyp, Qańtar oqiǵasy kezinde kemi 238 adam qaza tapty. Keibir sarapshylar "daǵdarysqa qarsy tiimdi shara qoldana almaǵan bilik narazylyqtyń artýyna jol ashyp otyr" dep esepteidi.
