قازاقستاندا سۇيىتىلعان گاز تاپشى جەنە بۇل مەسەلە جۋىق ارادا شەشٸلمەيدٸ. سەرسەنبٸ كٷنٸ جۋرناليستەردٸڭ سۇراقتارىنا جاۋاپ بەرگەن ەنەرگەتيكا مينيسترٸ الماسادام سەتقاليەۆ وسىلاي دەپ مەلٸمدەدٸ.
"نارىقتا گاز ەدەۋٸر تاپشى. قازٸر اۆتوجٷرگٸزۋشٸلەرگە: اتالعان وتىن تٷرٸ ەلدە تاپشى جەنە بۇل مەسەلە جۋىق ارادا شەشٸلمەيدٸ دەپ اشىق ايتۋعا مەجبٷرمٸز" دەدٸ سەتقاليەۆ. ونىڭ سٶزٸنەن Vlast كەلتٸرەدٸ.
مينيستردٸڭ ايتۋىنشا, كەيٸنگٸ 9 ايدا گازدى تۇتىنۋ كٶلەمٸ 25 پايىزعا ارتقان, ياعني قازٸر ايىنا 225-250 مىڭ توننا گاز تۇتىنادى. ەگەر بۇل تەندەنتسييا جالعاسا بەرسە جەنە شارا قولدانىلماسا, گاز تاپشىلىعى ۋشىعادى.
ول ازاماتتارمەن تٷسٸندٸرمە جۇمىستارىنىڭ ماڭىزدىلىعىن اتاپ ٶتٸپ, ەنەرگەتيكا مينيسترلٸگٸنٸڭ اۆتوگاز باعاسىن ٶسٸرۋ باستاماسى ٷكٸمەت دەڭگەيٸندە كەڭٸنەن تالقىلانادى دەدٸ.
"مەملەكەتتٸڭ ەلەۋمەتتٸك وسال توپتاردى قولداۋ نورمالارىن قولدانۋعا مٷمكٸندٸگٸ بار. مەملەكەتتە ٶندٸرٸستٸ سۋبسيدييالاۋ ارقىلى قولداۋ قۇرالى بار. ٷكٸمەت كەز كەلگەن جاعدايدا تەڭگەرٸمدٸ تٷردە ەرەكەت ەتەدٸ" دەدٸ ول.
بٸر اپتا بۇرىن, 1 قاراشادا ەنەرگەتيكا مينيسترٸ الماسادام سەتقاليەۆ سۇيىتىلعان گاز باعاسىنىڭ ٶسەتٸنٸن حابارلاعان. مينيستر "گاز باعاسى بٸردەن ەمەس, ساتىلى تٷردە 110 تەڭگەگە دەيٸن ٶسەدٸ" دەگەن. سەتقاليەۆتٸڭ سٶزٸنشە, قازٸر وتىن گازاسى ٸشكٸ نارىققا ٶز باعاسىنان تٶمەن — 50-80 تەڭگە ارالاعىندا ساتىلىپ جاتىر.
قازاقستاندا بٶلشەك ساۋداداعى سۇيىتىلعان گازدىڭ شەكتٸك مٶلشەرٸن مەملەكەت رەتتەيدٸ.
ەنەرگەتيكا مينيسترلٸگٸ قىركٷيەك ايىندا سۇيىتىلعان مۇناي گازىنىڭ شەكتٸك باعاسىن انىقتاۋ ەرەجەسٸ بەكٸتٸلگەن مينيستردٸڭ قاۋلى جوباسىن جارييالاعان. وعان سەيكەس, ەندٸ سۇيىتىلعان گاز باعاسى جارتى جىل سايىن ٶزگەرٸپ وتىرادى (بۇعان دەيٸن جىلىنا بٸر رەت ٶزگەرتٸلگەن).
2022 جىلى قاڭتاردا جاڭاٶزەندە جۇرت سۇيىتىلعان گاز باعاسىنىڭ قىمباتتاۋىنا قارسى نارازىلىق بٸلدٸرٸپ, مۇنى قازاقستاننىڭ باسقا ايماعى دا قولداعان. سۇيىتىلعان گاز باعاسىنا قارسىلىق كەيٸن باسقا دا ەلەۋمەتتٸك تالاپتارعا ۇلاسقان. ارتىنشا نارازىلىق ەلدە تەرتٸپسٸزدٸككە ۇلاسىپ, قاڭتار وقيعاسى كەزٸندە كەمٸ 238 ادام قازا تاپتى. كەيبٸر ساراپشىلار "داعدارىسقا قارسى تيٸمدٸ شارا قولدانا الماعان بيلٸك نارازىلىقتىڭ ارتۋىنا جول اشىپ وتىر" دەپ ەسەپتەيدٸ.
