Búgin QR Saýda jáne integratsiia ministri Arman Shaqqaliev brifing barysynda jýrnalisterdiń suraqtaryna jaýap bere otyryp, Qazaqstannan AQSh-qa eksporttalatyn taýarlardyń 95%-y gaz ekenin, oǵan jańadan engizilgen baj salyǵy qoldanylmaitynyn málimdedi, dep habarlaidy Dalanews.kz.
"Bul arada AQSh tarapynan belgili bir elderge, shartty túrde aitqanda, qaqtyǵystyń demeýshisi retinde áreket etetin memleketterge qosymsha kedendik baj salyǵyn engizý týraly bolyp otyr. Men sanktsiialarǵa qatysty birjaqty, naqty ári túbegeili túrde bylai dep aitamyn: "Biz óz mindettemelerimizdi buzyp otyrǵan joqpyz". Oiyn erejesi bizde aiqyn. Biz áriptesterimizben eksporttyq baqylaý boiynsha óz mindettemelerimizdiń qalai oryndalatynyn qadaǵalap otyrmyz. Áńgime Tramp jarlyǵymen jáne aqparattyq hatpen engizilgen 25% qosymsha baj salyǵy týraly bolyp otyr. Munda mynany naqty túsinip alǵan jón: bizdiń eksportymyzdyń 95%-y osy qosymsha baj salyǵynyń aiasyna kirmeidi. Óz tarapymyzdan biz naqty usynystarymyzdy joldap ta qoidyq. Qazir kelissózder júrip jatyr. Jalpy, kedendik baj salyǵyna qatysty barlyq másele boiynsha bizde DSU aiasynda naqty erejeler bekitilgen. Biraq qazirgi jaǵdai múldem standartqa kelmeidi, óitkeni bul DSU erejelerin jáne halyqaralyq mindettemelerdi buzý bolyp tabylady. Sondyqtan biz de standartty emes sheshimder qabyldap otyrmyz. Biz atalǵan máselede artqa sheginbei, kerisinshe eksportty keńeitýge baǵyttalǵan naqty sharalardy usyndyq", – dedi Shaqqaliev.
Aita keteiik, buǵan deiin AQSh prezidenti Donald Tramp Qazaqstannan keletin taýarlarǵa 25% baj salyǵyn resmi túrde engizgen bolatyn. Keiin Qazaqstannyń AQSh-pen osy baǵytta kelissózder júrgizilip jatqany belgili boldy.
