بۇگىن ق ر ساۋدا جانە ينتەگراسيا ءمينيسترى ارمان شاققالييەۆ بريفينگ بارىسىندا جۋرناليستەردىڭ سۇراقتارىنا جاۋاپ بەرە وتىرىپ، قازاقستاننان اقش-قا ەكسپورتتالاتىن تاۋارلاردىڭ 95%-ى گاز ەكەنىن، وعان جاڭادان ەنگىزىلگەن باج سالىعى قولدانىلمايتىنىن مالىمدەدى، دەپ حابارلايدى Dalanews.kz.
"بۇل ارادا اقش تاراپىنان بەلگىلى ءبىر ەلدەرگە، شارتتى تۇردە ايتقاندا، قاقتىعىستىڭ دەمەۋشىسى رەتىندە ارەكەت ەتەتىن مەملەكەتتەرگە قوسىمشا كەدەندىك باج سالىعىن ەنگىزۋ تۋرالى بولىپ وتىر. مەن سانكسيالارعا قاتىستى ءبىرجاقتى، ناقتى ءارى تۇبەگەيلى تۇردە بىلاي دەپ ايتامىن: "ءبىز ءوز مىندەتتەمەلەرىمىزدى بۇزىپ وتىرعان جوقپىز". ويىن ەرەجەسى بىزدە ايقىن. ءبىز ارىپتەستەرىمىزبەن ەكسپورتتىق باقىلاۋ بويىنشا ءوز مىندەتتەمەلەرىمىزدىڭ قالاي ورىندالاتىنىن قاداعالاپ وتىرمىز. اڭگىمە ترامپ جارلىعىمەن جانە اقپاراتتىق حاتپەن ەنگىزىلگەن 25% قوسىمشا باج سالىعى تۋرالى بولىپ وتىر. مۇندا مىنانى ناقتى ءتۇسىنىپ العان ءجون: ءبىزدىڭ ەكسپورتىمىزدىڭ 95%-ى وسى قوسىمشا باج سالىعىنىڭ اياسىنا كىرمەيدى. ءوز تاراپىمىزدان ءبىز ناقتى ۇسىنىستارىمىزدى جولداپ تا قويدىق. ءقازىر كەلىسسوزدەر ءجۇرىپ جاتىر. جالپى، كەدەندىك باج سالىعىنا قاتىستى بارلىق ماسەلە بويىنشا بىزدە دسۇ اياسىندا ناقتى ەرەجەلەر بەكىتىلگەن. ءبىراق قازىرگى جاعداي مۇلدەم ستاندارتقا كەلمەيدى، ويتكەنى بۇل دسۇ ەرەجەلەرىن جانە حالىقارالىق مىندەتتەمەلەردى بۇزۋ بولىپ تابىلادى. سوندىقتان ءبىز دە ستاندارتتى ەمەس شەشىمدەر قابىلداپ وتىرمىز. ءبىز اتالعان ماسەلەدە ارتقا شەگىنبەي، كەرىسىنشە ەكسپورتتى كەڭەيتۋگە باعىتتالعان ناقتى شارالاردى ۇسىندىق"، – دەدى شاققالييەۆ.
ايتا كەتەيىك، بۇعان دەيىن اقش پرەزيدەنتى دونالد ترامپ قازاقستاننان كەلەتىن تاۋارلارعا 25% باج سالىعىن رەسمي تۇردە ەنگىزگەن بولاتىن. كەيىن قازاقستاننىڭ اقش-پەن وسى باعىتتا كەلىسسوزدەر جۇرگىزىلىپ جاتقانى بەلگىلى بولدى.
