Qazaqstannyń týrizm jáne sport ministri Erbol Myrzabosynov Úkimettegi brifing barysynda boksshy Jánibek Álimhanulyna qatysty doping máselesine toqtaldy, dep habarlaidy Dalanews.kz.
"Iá, ókinishke qarai, mańyzdy jekpe-jek qarsańynda osyndai jaǵdai oryn aldy. Alaida ekinshi synama ashylady, ol 8 qańtarǵa josparlanǵan. Jánibektiń komandasy da, biz de ekinshi synamanyń nátijesin kútip otyrmyz. Aqparat keiinirek beriledi", - dedi ministr.
Eske salaiyq, 6 jeltoqsanda Jánibek Álimhanuly Kýba boksshysy Erislandi Laramen jekpe-jekke shyǵýy tiis edi. Alaida kezdesýdiń bolmaityny resmi túrde habarlandy. Buǵan qazaqstandyq boksshynyń analizinen meldonii atty tyiym salynǵan preparat tabylǵany sebep boldy.
Keiin bul jaǵdaiǵa Týrizm jáne sport vitse-ministri Serik Jarasbaev pikir bildirdi.
Vitse-ministr qazirgi ýaqytta vedomstvo Jánibektiń komandasymen turaqty bailanysta ekenin jetkizdi. Sheneýnik oqiǵany saraptaýǵa asyqpai, resmi tergeý qorytyndysyn kútýdi usyndy.
"Jánibek Álimhanulynyń jekpe-jegine qatysty men buǵan deiin de pikir bildirdim. Qazir Týrizm jáne sport ministrligi Jánibektiń komandasymen bailanysta. Ókinishke qarai, uiymdastyrýshylar onyń synamasynan... tyiym salynǵan zat anyqtalǵanyn habarlady. Saldarynan jekpe-jek toqtatyldy. Degenmen biz onyń doping qoldanbaǵanyna senemiz jáne senimdimiz. Ol zattyń aǵzasyna qalai túskeni áli anyqtalýy kerek. Bul máselemen antidopingtik uiymdar ainalysady. Qorytyndyǵa asyqpaýǵa keńes beremiz. Antidopingtik tergeý tolyq aiaqtalsyn. Qajet bolǵan jaǵdaida ministrlik halyqaralyq sarapshylardy tartýǵa daiyn", – dedi vitse-ministr.
Vedomstvo ókilderi tergeý nátijesi shyqpai turyp boksshyǵa aiyp taǵý durys emes dep sanaidy. Jarasbaevtyń aitýynsha, qajet bolǵan jaǵdaida Ministrlik Jánibekke qoldaý kórsetip, halyqaralyq deńgeidegi sarapshylardy da tartýy múmkin.
