قازاقستاننىڭ تۋريزم جانە سپورت ءمينيسترى ەربول مىرزابوسىنوۆ ۇكىمەتتەگى بريفينگ بارىسىندا بوكسشى جانىبەك ءالىمحانۇلىنا قاتىستى دوپينگ ماسەلەسىنە توقتالدى، دەپ حابارلايدى Dalanews.kz.
"ءيا، وكىنىشكە قاراي، ماڭىزدى جەكپە-جەك قارساڭىندا وسىنداي جاعداي ورىن الدى. الايدا ەكىنشى سىناما اشىلادى، ول 8 قاڭتارعا جوسپارلانعان. جانىبەكتىڭ كومانداسى دا، ءبىز دە ەكىنشى سىنامانىڭ ناتيجەسىن كۇتىپ وتىرمىز. اقپارات كەيىنىرەك بەرىلەدى"، - دەدى مينيستر.
ەسكە سالايىق، 6 جەلتوقساندا جانىبەك ءالىمحان ۇلى كۋبا بوكسشىسى ەريسلاندي لارامەن جەكپە-جەككە شىعۋى ءتيىس ەدى. الايدا كەزدەسۋدىڭ بولمايتىنى رەسمي تۇردە حابارلاندى. بۇعان قازاقستاندىق بوكسشىنىڭ اناليزىنەن مەلدونيي اتتى تىيىم سالىنعان پرەپارات تابىلعانى سەبەپ بولدى.
كەيىن بۇل جاعدايعا تۋريزم جانە سپورت ۆيسە-مينيسترى سەرىك جاراسبايەۆ پىكىر ءبىلدىردى.
ۆيسە-مينيستر قازىرگى ۋاقىتتا ۆەدومستۆو جانىبەكتىڭ كومانداسىمەن تۇراقتى بايلانىستا ەكەنىن جەتكىزدى. شەنەۋنىك وقيعانى ساراپتاۋعا اسىقپاي، رەسمي تەرگەۋ قورىتىندىسىن كۇتۋدى ۇسىندى.
"جانىبەك ءالىمحان ۇلىنىڭ جەكپە-جەگىنە قاتىستى مەن بۇعان دەيىن دە پىكىر ءبىلدىردىم. ءقازىر تۋريزم جانە سپورت مينيسترلىگى جانىبەكتىڭ كومانداسىمەن بايلانىستا. وكىنىشكە قاراي، ۇيىمداستىرۋشىلار ونىڭ سىناماسىنان... تىيىم سالىنعان زات انىقتالعانىن حابارلادى. سالدارىنان جەكپە-جەك توقتاتىلدى. دەگەنمەن ءبىز ونىڭ دوپينگ قولدانباعانىنا سەنەمىز جانە سەنىمدىمىز. ول زاتتىڭ اعزاسىنا قالاي تۇسكەنى ءالى انىقتالۋى كەرەك. بۇل ماسەلەمەن انتيدوپينگتىك ۇيىمدار اينالىسادى. قورىتىندىعا اسىقپاۋعا كەڭەس بەرەمىز. انتيدوپينگتىك تەرگەۋ تولىق اياقتالسىن. قاجەت بولعان جاعدايدا مينيسترلىك حالىقارالىق ساراپشىلاردى تارتۋعا دايىن"، – دەدى ۆيسە-مينيستر.
ۆەدومستۆو وكىلدەرى تەرگەۋ ناتيجەسى شىقپاي تۇرىپ بوكسشىعا ايىپ تاعۋ دۇرىس ەمەس دەپ سانايدى. جاراسبايەۆتىڭ ايتۋىنشا، قاجەت بولعان جاعدايدا مينيسترلىك جانىبەككە قولداۋ كورسەتىپ، حالىقارالىق دەڭگەيدەگى ساراپشىلاردى دا تارتۋى مۇمكىن.
