Sońǵy kúnderi áleýmettik jelilerde Astanadaǵy tanymal sýpermarketke qatysty bolǵan til máselesine qatysty janjal qoǵamda úlken rezonans týdyrdy. Osy oqiǵa aiasynda jýrnalist Bibigúl Dáýletbekqyzy oqý-aǵartý ministri Ǵani Beisembaevqa úndeý jariialap, sheneýnikterdiń únsizdigine ashyq narazylyq bildirdi, dep habarlaidy Dalanews.kz.
“Ǵani Beisembaev, siz ózi barsyz ba bul álemde?” deidi jýrnalist. Ol bul oqiǵanyń jai ǵana turmystyq janjal emes, memlekettik deńgeidegi másele ekenin alǵa tartady. Onyń aitýynsha, qazaq tilin talap etkeni úshin jumysynan aiyrylǵan qarapaiym kýrerdiń taǵdyry men oqýshy tárbielep otyrǵan muǵalimniń áreketi – ministrlik nazarynan tys qalmaýy tiis.
“Shýdy bastaǵan – mektepte sabaq beretin muǵalim. Aty-jóni – Asylhan Alimhanovich. Álimhanuly emes – Alimhanovich”, – dep jazady Bibigúl Dáýletbekqyzy.
Jýrnalisttiń aitýynsha, oqiǵa barysynda kýrer jai ǵana “qazaqsha sóileseńiz jaqsy bolar edi” dep ótinish bildirgen. Al bul sóz muǵalim tarapynan agressiia retinde qabyldanyp, artynsha daýǵa ulasqan.
“Jai ǵana tilin qorǵaǵysy kelgen aýyl qazaǵy jumystan qýyldy. Jasy – 38-de. Kópbalaly áke. Jaqynda jubaiy bosanýy kerek. Al muǵalim TikTok-ta kúnde sýret salyp otyr. Keshirim suraý, ókinish – joq. Tańdaý ózimde deidi” – deidi jýrnalist.
Ministr Beisembaev nege únsiz? Jýrnalist bul jaǵdaiǵa ministr Ǵani Beisembaevtyń pikir bildirmeýin qatań synǵa alady.
“Ashat Aimaǵambetov mundai kezde únsiz qalmaityn. Helloýin ótkizildi dese, sol kúni toqtatatyn. Facebook paraqshasynan halyqpen keri bailanys ornatatyn. Al qazirgi ministrdiń paraqshasyn aqtarsam – bári tamasha, ómir keremet. Atyraýda kók týymyzdy qorlaǵan hidjabtaǵy oqýshy qyz týraly da, Semeide taiaq jegen jetim bala jaily da bir aýyz sóz joq”, – deidi avtor.
Jýrnalist ministrdiń áleýmettik jelide halyqpen ashyq bailanys ornatpaǵanyn atap ótip, ony "buqaramen úzilip qalǵan dialog" dep baǵalaidy.
Jýrnalist "ana tilinde sóileýdi suraǵan azamatty jumysynan aiyrǵan ustazdan shákirt ne úirenedi?" deidi.
“Óz ana tili úshin arandatýshylyq jasaityn muǵalimnen qandai urpaq ósedi? Bul suraqqa ministrlik te, qoǵam da jaýap berýi kerek”, – deidi Bibigúl Dáýletbekqyzy.
Jýrnalist ministr Beisembaevqa keńesshi bolýǵa ázir ekenin, eger qajet bolsa, áleýmettik jelidegi qatynas, kommýnikatsiia men sheshendik baǵytynda kómektesýge daiyn ekenin de ázil-shyny aralas jetkizdi.
Kontekst
Áleýmettik jelilerde Magnum sýpermarketter jelisiniń kýreriniń jumystan shyǵarylýy qoǵamda úlken talqyǵa tústi. Bul jaǵdai kýrerdiń klientten qazaq tilinde sóileýin suraýynan keiin bolǵan.
Klient Asylhan esimdi azamattyń aitýynsha, ol Magnum-nan azyq-túlikke tapsyrys bergen kezde, kýrer odan qazaqsha sóileýdi talap etken. Keiin bul oqiǵa áleýmettik jelide jariialanyp, nátijesinde kýrer jumystan qýylǵan.
Bul jaǵdai qoǵamda úlken narazylyq týdyrdy. Kóptegen qazaqstandyqtar Magnum jelisine boikot jariialaitynyn málimdedi. Áleýmettik jeli qoldanýshylary kompaniianyń áreketin synǵa alyp, memlekettik tilge degen qurmettiń tómendigin atap ótti.
