Belgili jýrnalist Erqanat Kópjasar politseilerdiń áreketine narazy boldy, dep habarlaidy Dalanews.kz.
Jýrnalist politsiia eń aldymen jazalaýshy emes, halyqqa qyzmet kórsetetin organ ekenin atap ótti.
"Bul memleket basshysynyń udaiy aityp kele jatqan ustanymy. Biraq is júzinde ne kórip jatyrmyz? Eki jaǵaustatar jaǵdaidy mysalǵa keltireiin. Almaty, Almaty oblysynyń politsiia departamentine, kerek deseńizder, ákimderiniń nazaryna. Politsiia qyzmetkerleri zeinet jasyndaǵy ájege kóshede ashytylǵan qyryqqabat satyp turǵany úshin 25 myń teńge aiyppul salǵan. Ózi 75 myń teńge zeinetaqy alady, onyń 25 myńyn aiyppul tólese, ar jaǵynda 50 myńǵa qalai kún kórmek? Dál osy sheshimdi qabyldaǵan politsei, siz nege súiendińiz? Bul qanshalyq ádil sheshim? Zańnyń rýhy qaida? Bári jaqsy qoǵam qalyptastyryp, jaqsy ómir súreiik dep bári talpynyp júrgen kezde, qoǵamnyń jiirkenishin týdyrýdyń qajeti qandai?", - deidi jýrnalist.
Jýrnalist taǵy bir mysaldy keltirdi.
"Almaty oblysy, Eńbekshiqazaq aýdanyna Mońǵoliiadan kópbalaly otbasy kóship kelgen. Jumysynan shyǵyp, úiin satyp, tórt balasymen Esik qalasyna kóship kelgen. Sol aýylda jezdesiniń úiine tirkeýge turǵan. Biraq kópbalaly otbasy ol úige syimai, basqa jaqqa baryp turady. Álgi otbasy tirkeýde turǵan úige kóshi-qon politsiiasy kelgen. Ol adamdar sol úide bolmaǵandyqtan úidiń iesin alyp ketip, tórt saǵat tergep, hattama toltyryp, sotqa bergen. Sot úi iesine aiyppul salyp, qaqaǵan qysta Mońǵoliiadan kóship kelgen kópbalaly otbasyny deportatsiialaý týraly sheshim qabyldaǵan. Bes kúnniń ishinde Qazaqstanda tastap ket dep otyr. Bul ádiletti sheshim be? Qazir sol otbasy kóz jasy kól bolyp, ne isterin bilmei, bastary qatyp otyr. Nazarsyz qaldyrmaýlaryńyzdy suraimyn", - deidi Erqanat Kópjasar.
Ol bul úndeýin Almaty, Almaty oblysy ákimdigi, Ishki ister ministrligi, Bas prokýratýra men Joǵarǵy sotqa joldaǵan.
