Qazaqstannyń kórnekti jazýshysy, marqum Muhtar Maǵaýin kózi tirisinde bergen sońǵy suhbatynda eldi 30 jyl basqarǵan eks-prezident Nursultan Nazarbaevtyń biligine qatty syn aitty.
Bul týraly Dalanews.kz portaly habarlady. Jazýshy suhbatty jýrnalist Janar Baisemizge bergen.
Maǵaýinniń aitýynsha, Nazarbaev bastaǵan úkimet “qazaqty rýhani janshydy”, "eldi iesiz, jerdi jetim” etip qaldyrdy. Ol túrli dinder men kontseptsiialardyń tym ulǵaiyp, ulttyq bolmysqa yqpal etkenin synǵa alady. “30 jyl dalaǵa ketti” degen jazýshy, qazaq halqy sol kezeńde biliktiń qarsylyǵyna qaramastan tabiǵi jolmen kóbeigenin atap ótken.
"Qazaq jaǵalasyp otyryp kóbeidi. Qazaq áielderiniń balajandyǵy sonsha, týý men ósý toqtamady. Táýelsizdik alǵan jyldary qazaqtyń sany alty millionǵa jetti. Qazir 14 millionǵa jetti”, – dedi jazýshy.
Qalamger óz sózinde shetelden oralǵan qandastarǵa qatysty saiasattyń jetkilikti deńgeide qoldaý tappaǵanyn jasyrmai aitady.
Maǵaýinniń pikirinshe, syrtta júrgen qazaqtardyń qujat rásimdeýde túrli kedergilerge ushyraýy – “qazaqtyń kelýin boldyrmaý úshin jasalǵan” áreket. Máselen, Qytaidan sottalmaǵany týraly qaǵaz talap etkende, bul qujattyń ol elde múlde berilmeitini belgili bolǵan.
"Nazarbaevtyń úkimeti, qoiǵan adamdary talai adamdy jeksuryn qyldy. "Kele berińder" deidi de, júz túrli bóget oilap tapty. Qujatyn ala almai jyldap júredi. Bolmaityn, qisyny joq qujat surady. Qytaidan sottalmaǵany jaily qujat surady. Qytaida ondai bermeidi. Osynyń barlyǵy – qazaqty keltirmeý úshin Nazarbaevtyń oilap tapqany. Qazaq kóbeimeý kerek, kóterse, keýdesin kóterýi múmkin”, – dedi ol.
Muhtar Maǵaýin 10 qańtarda 85-ke qaraǵan shaǵynda avtory qaitys boldy. Jazýshynyń dúnieden ótkenin onyń uly Edige Maǵaýin Facebook-tegi paraqshasynda habarlaǵan edi.
"Arystan ákem fániden baqiǵa attanyp ketti, AQSh-tyń Merilend shtatyndaǵy úiinde, bala-shaǵasynyń ortasynda, 2025 jylǵy qańtardyń 9-y, jergilikti ýaqyt boiynsha saǵat 19:55-te (Qazaqstan ýaqyty boiynsha qańtardyń 10-y, saǵat tańǵy 5:55)" dep jazǵan bolatyn Edige Maǵaýin.
