Musylman úshin qurbandyq shalý – mindet
Jiynda Qazaqstan Musylmandary Dini basqarmasy tóraǵasynyń birinshi orynbasary, Túrkistan qalasy boiynsha keńse basshysy Naýryzbai qajy Ótpenov bul merekede qurbandyq shalý musylman úshin ýájip ekenin jetkizdi.
– Biyl 21 tamyzda tańǵy saǵat 7.00-de Túrkistan oblysy men Shymkent qalasy boiynsha QMDB-nyń ókildigine qarasty barlyq meshitterde Ait namazy oqylady. Qurbandyq shalý ýaqyty Qurban aittyń birinshi kúni ait namazynan keiin bastalyp, aittyń úshinshi kúnine deiin jalǵasady. Qurban arab tilinde «jaqyndaý» degen maǵynany bildiredi. Iaǵni, saýap ister arqyly júrekti tazartyp, Allaǵa jaqyndai túsý degen sóz. Qurban Ait merekesinde árbir musylman jańa nemese eń taza kiimderin kiip, bir-birine syilyq syilap, jyly sózder aityp, quttyqtaýy tiis. Qaiyrymdylyq jasaǵany abzal Elbasy Jarlyǵymen Qurban ait elimizdegi resmi merekeler qataryna endi. Ulttyq merekege ainaldy. Parasatty sheshim el birligin nyǵaitýǵa úlken úles qosyp keledi. Biyl Saýd Arabiiasy patshalyǵynan qazaqstandyq 3 myń adamǵa qajylyqqa kvota berildi. Qajylyqqa baratyn azamattar úshin Qazaqstannyń 4 qalasynan tikelei áýe reisteri qatynaidy, – dedi Naýryzbai qajy Ótenov.
Baspasóz máslihatynda memleket jáne qoǵam qairatkeri, el aǵasy Shalatai Myrzahmetov: «Biz bala kezden Qurban Ait pen Naýryz merekelerin erekshe kútip, atap ótetinbiz. Bul – meiirimdilik pen tatýlyq merekesi. Merekede qarsańynda kásipkerler dúkenderde alkogoldi ishimdik satýdy toqtatyp, toi-domalaqtar araq-sharapsyz ótse» degen tilegin bildirdi. Al, QMDB-nyń Shymkent qalasy boiynsha ókil imamy Baqtybai Beisenbaev óńirde halal standarttaryna sáikes mal soiý beketteri ashylǵanyn, Shymkent qalasynyń ózinde 5 mal soiý beketi qyzmet kórsetetinin aitty.
– Qurbandyq shalýshylarǵa qoiylatyn talaptarǵa kelsek, ol musylman bolýy jáne baliǵat jasyna tolýy qajet. Negizgi qajettilikterden tys qarjysy bolǵany jón. 85 gramm altynnyń qunyna teń qarajaty bar árbir musylman úshin qurbandyq shalý – ýájip. Mindet deýge de bolady. Qurbandyqqa qoi, eshki, siyr jáne túie maly jaraidy. Bul merekede musylmandar qurbandyqqa shalynǵan mal etiniń bir bóligi kedei-kepshikter men muqtaj jandarǵa, bir bóligi kórshiler men týystarǵa taratylsa, úshten bir bóligin óz otbasyna qaldyrady. Meshitterde «Qurbandyq etin muqtaj jandarmen bólis» atty qaiyrymdylyq sharasy ótedi. Osyǵan qatysýǵa shaqyramyz. Arnaiy mal soiý beketterinde bilikti qasapshylar jumys isteidi. Etti saqtaityn salqyndatqyshtar da bar. Ol et muqtaj otbasylarǵa taratylady. Ait namazynan keiin meshitter mańynda ulttyq sport túrlerinen saiystar uiymdastyrylyp, ónerpazdarymyz kontserttik baǵdarlama usynady, – dedi Baqtybai Qydyrbaiuly.
Túrkistan oblysy ákiminiń baspasóz qyzmeti
